Andrey Miklyaev: "Al Taavon" OCHLda birinchi bor ishtirok etmoqda"

Unda dastlab “Lokomotiv” bosh murabbiyi Andrey Miklyaev ishtirok etdi. Unga 33-raqamdagi futbolchi Oleg Zoteev hamrohlik qildi.

Andrey Gennadevich savollarga javob qaytarar ekan, “Lokomotiv” yana bir bora Saudiya Arabistoniga tashrif buyurganidan mamnun ekanligini aytib o'tdi.

“Biz bu erga necha marta kelgan bo'lsak, har safar iliq taassurotlar bilan qaytganmiz. Umid qilamanki, bu safar ham shunday bo'ladi. “Al Taavon” Osiyo chempionlar ligasida birinchi bor ishtirok etmoqda, ular bundan xursand ekanliklari turgan gap”.

“Biz ertaga shu yil hisobidan birinchi rasmiy uchrashuvni o'tkazamiz va o'yin qanday kechishini oldindan aytish qiyin. Saudiya chempionatida mavsum ayni qizg'in pallaga kirgan, bizda esa chempionat hali boshlangani yo'q. Lekin biz bu haqda o'ylayotganimiz yo'q, chunki bu erga ijobiy natija bilan qaytish maqsadida kelganmiz”.

“Al Taavon”ni yaxshilab o'rganishga harakat qildik. Ularning oxirgi ikkita uchrashuvini diqqat bilan kuzatib chiqdik. Jamoa yaxshi holatda. Biz mavsumga tayyorgarliknining asosiy qismini dastlab Dubayda, keyin Antaliyada olib bordik. Yigitlar ertangi o'yinga tayyor” – deya aytib o'tdi Andrey Miklyaev.

Jurnalistlardan biri Oleg Zoteevga quyidagi savol bilan murojaat qildi: “Saudiyada futbolchilar tezkor va texnikasi zo'r, O'zbekistonda esa jismonan kuchli futbolchilar ko'p. Bu haqda nima deya olasiz?”

Ushbu savolga javoban Zoteev quyidagi fikrni bildirdi: “O'zbekistonda ham texnik tomonlama mahoratli futbolchilar ko'p, xususan bizning jamoada ham bunday futbolchilar etarlicha topiladi. Agar ishonmasangiz, ertaga o'yinimizni ko'ring va bunga o'zingiz guvoh bo'lasiz”.