APL. Superto'qnashuv boshlanishiga oz vaqt qolmoqda

Biz uchun eng katta qarama-qarshilik Toshkentda bo'lib o'tadi. "CHempionlik o'yini"da "Paxtakor" jamoasi "Lokomotiv"ni qabul qiladi. Ammo, hozir boshqa bir daxshatli to'qnashuv haqida yozmoqchimiz.

APL, 9-tur
20.10.2018, 16:30
"Stemford Bridj", London
"CHelsi" - "Manchester Yunayted"
Bosh hakam: Mayk Din

Tumanli albionda bugun "Titanlar jangi"ga guvoh bo'lamiz. Yangi bosh murabbiy Mauricio Sarri bilan birga mavsumni ajoyib boshlagan "CHelsi" o'z maydonida Joze Mourino boshchiligida muammolar girdobiga tushib qolgan "Manchester Yunayted"ni qabul qiladi. Jamoalarning ayni paytda turnir jadvalida egallab turgan o'rnidan qati nazar uchrashuv markaziy maqomida bo'laveradi.

"CHelsi" Sarri qo'lostida 4-3-3 taktik sxemasida to'p tepmoqda. Jamoa to'pga egalik qilishni yaxshi ko'radi, italiyalik mutaxassis to'p doimo uning shogirdlarida bo'lishini xohlaydi. SHuningdek, raqib to'pni egallab turgan pallada jamoa yuqori pressing uyushtiradi va shu orqali to'pni tezroq olib qo'yishga urinadi. Ayni paytda londonliklar tomoshabop futbol namoyish etishmoqda. Bugungi "CHelsi" ayni paytdagi MYUdan kuchli. Lekin, bunday uchrashuvlarda tomonlarning holati ikkinchi planga tushadi. Hammasi kimning qanday tayyorgarlik ko'rganiga bog'liq bo'lib qoladi. Bunda ruhiyat muhim ahamiyat kasb etadi.

"CHelsi"ning asosiy quroli - Eden Azar. Hozir Azar Premer-ligadagi eng kuchli 3 o'yinchidan biri. Mourino oldingi yillarda unga nisbatan ikki bor bir o'yinchini alohida qo'riqlashni topshirgan. Bir safar Errera Edenni qo'riqlashni "qotirib qo'ygan" bo'lsa, yana bir marta Skott Maktominey kuchli raqibni ancha zararsizlantira olgan edi. Belgiyalikning formasidan kelib chiqadigan bo'lsak, bugun ham unga personal "qo'riqchi" kerakdek ko'rinmoqda.

"Manchester Yunayted"ni juda murakkab davr kutib turibdi. Yaqin 3 hafta ichida Mour shoigrdlari "CHelsi", "Yuventus" va "Manchester Siti"ga qarshi o'yinlarni o'tkazishlari kerak bo'ladi. Ko'rib turganingizdek, shundoq ham turli muammolar va jarohatlar girdobida qolgan MYUni og'ir o'yinlar qarshi oladi.

Joze bugun "Stemford Bridj"ga qaytadi. Bu stadionga keladigan mezbon muxlislarda u bilan bog'liq ajoyib va salbiy xotiralar bor. "Yunayted"da kadrlar bilan bog'liq jiddiy muammolar yuzaga kelgan. Roxo va Lingardning o'ynamasligi deyarli aniq. Matich, SHou, Maktominey, Dalotlarning maydonga tushishi ham katta so'roq ostida. Hammasi ularning bugun tongda qay ahvolda bo'lishganiga bog'liq. Ander Errera esa endigina jarohatidan tiklanib safga qaytdi. Lekin, hozirgi holatdan kelib chiqsak, Joze Anderni maydonga tushirsa kerak. Bundan tashqari, murabbiy va Aleksis Sanchesning o'zaro munosabatlari ham yomonlashgan va bu narsa chililikning maydonga tushish ehtimolini kamaytiradi.

Taxminiy tarkiblar:

"CHelsi": Kepa Arrisabalaga – Sezar Aspilikueta, Antonio Ryudiger, David Luis, Markos Alonso – Jorjino, Ngolo Kante, Mateo Kovachich – Pedro, Olive Jiru, Eden Azar.

"Manchester Yunayted": David De Xea – Antonio Valensiya, Viktor Lindelyof, Kris Smolling, Lyuk SHou – Fred (Matich), Ander Errera, Pol Pogba – Markus Reshford, Romelu Lukaku, Xuan Mata.

O'ynamaydi: Ampadu – Roxo, Lingard.
So'roq ostida: Ryudiger – Sanches, SHou, Fellayni, Errera, Matich, MakTominey.

SHuningdek, bugun APL 9-turi doirasida quyidagi bellashuvlar o'tkaziladi:

16:30. "CHelsi" - "Manchester Yunayted"
19:00. "Bornmut" - "Sautgempton"
19:00. "Kardiff" - "Fulxem"
19:00. "Manchester Siti" - "Byornli"
19:00. "Nyukasl" - "Brayton"
19:00. "Vest Xem" - "Tottenxem"
19:00. "Qulqerxempton" - "Uotford"
21:30. "Xaddersfild" - "Liverpul"