Armiya o'yinlarida ilk g'alaba: “REMBAT”chilarimiz ikkinchi o'rinni qo'lga kiritdi

Quvonarlisi, unda ishtirok etgan O'zbekiston terma jamoasi yakka tartibdagi poyga, harbiy texnika estafetasi, otish tayyorgarligi, jamoa sardorlari bellashuvi shartlarini ko'ngildagidek bajarib, yakunda umumjamoa hisobida faxrli ikkinchi o'rinni qo'lga kiritdi.

Bu haqda Mudofaa vazirligi Axborot va ommaviy kommunikaciyalar departamenti O'zAga malum qildi.

Musobaqa 4 avgust kuni start olgan edi. O'zbekiston harbiy mutaxassislari ushbu musobaqada birinchi marotaba ishtirok etishiga qaramay, beshta bosqichdan iborat bo'lgan bahslarning to'rttasida ikkinchi, bittasida esa birinchi o'rinni qo'lga kiritdi. Umumiy hisobda Rossiya birinchilikni qo'lga kiritdi. Uchinchi o'rin Laos jamoasiga nasib etdi. Dunyoning kuchli 8 jamoasi ishtirok etgan mazkur musobaqada O'zbekiston vakillari jami 6 022 ball yig'di.

– Yigitlarimiz ushbu musobaqaga jiddiy tayyorgarlik ko'rgan edi, – deydi jamoaga boshchilik qilayotgan podpolkovnik Ismoil Navro'zov. – Odam yursa oyog'i, qush uchsa qanoti kuyadigan jaziramalarda toblanishdi. Mana bugun o'sha zahmatlarning mevasidan bahramand bo'lyapmiz. Albatta, g'alaba lazzati hammaga ham yoqadi. Lekin bu birgina bizning emas, balki ona Vatanimizning ham yutug'idir.

Yigitlarimizning ushbu yutug'i Xalqaro armiya o'yinlarida ishtirok etayotgan boshqa jamoalarimizga ham kuch-g'ayrat va shijoat baxsh etishi tabiiy.