Armrestling. Osiyo chempionatida 108 ta medal bilan ikkinchi bo'ldik FOTOGALEREYA

6-12 iyun kunlari oralig'ida bo'lib o'tgan qita chempionatida 16 davlatdan 1000ga yaqin armrestlingchilar ishtirok etishdi. Yurtimiz sharafini esa Qurbon Konishev boshchiligidagi 120 nafar atletimiz himoya qildi. 

Osiyo chempionati kichik o'smirlar (14-15 yosh), o'smirlar (17-18 yosh), yoshlar (19-21 yosh), kattalar (ayollar va erkaklar), faxriylar hamda jismoniy imkoniyati cheklangan sportchilar o'rtasida tashkil etildi. 

Hamyurtlarimizdan o'smirlar o'rtasida Nazokat Sorlieva (60 kg), Zarnigor Abdurahimova (45 kg), Siroj Tursunov (70 kg), Zuhra Xo'jaqulova (65 kg) 2 tadan oltin medalni terma jamoamiz hisobiga qo'shib qo'yishdi. 

Para armrestling bahslarida ishtirok etgan bir necha karra jahon chempioni Umidjon Ahmedov 90 kg vazn toifasida yana bir bor Osiyo chempionatining oltin medalini qo'lga kiritdi. 

Osiyo chempionati yakunlariga ko'ra O'zbekiston terma jamoasi sportchilari 26 ta oltin, 30 ta kumush, 52 ta bronza medali bilan umumjamoa hisobida ikkinchi o'rinni qo'lga kiritishdi.