Asosiy jang ishtirokchisi "uxlab" qoldi. PFL Gran-pri turnirining barcha natijalari bitta xabarda

Bu yil hisobidan ilk bor o'tkazilgan ushbu turnirda chorak final janglari tashkil etildi. Rossiyalik yarimo'rta vazn toifasi vakili Andrey Koreshkov oqshomning asosiy jangida sobiq Bellator chempioni Jeyson Jeksonga imkoniyatni boy berdi. Tajribali Jekson ikkinchi raundda "Spartanc"ni bo'g'ib qo'ydi. 

Yana bir rus aralash yakkakurash ustasi Muhammad Berxamov prelim kardni yakunlab bergan jangda amerikalik Ted Jinga birinchi raunddayoq yutqazdi. Raundning so'nggi daqiqasida Jin chap tomondan berilgan kuchli va aniq zarba evaziga Berxamovni nokautga uchratdi. Endi Jekson va Jin Gran-pri 1/2 finalida o'zaro oktagonda to'qnash kelishadi. Ikkinchi yarim final juftligida esa Logan Storli va Masayuki Kikuiri o'zaro jang qilishadi. 

Ushbu bosqichda rossiyaliklardan birgina yarimengil vazn toifasi vakili Movlid Xaybulaev g'alaba qozondi. U hakamlarning ayri qarori bilan Jeremi Kennedini ochkolar hisobiga ko'ra taslim etdi va 1/2 finalga yo'l oldi. Movlid endi final yo'llanmasi uchun kechadigan jangda koreyalik Tay Kyun Kimga qarshi jang o'tkazadi. Tay Kyun 1/4 finalda Neytan Kellini birinchi raunddayoq mag'lubiyatga uchratdi.

PFL World Tournament 1 turnirining barcha natijalari:

Jeyson Jekson Andrey Koreshkovni texnik sabmishn (ortdan bo'g'ish) evaziga 2-raundda taslim etdi – 2-paund, 4:21 (vaqt)

Xesus Pinedo Adam Borichni texnik nokautga uchratdi (zarba) – 1-raund, 3:43

Logan Storli Jozef Luchianoni ochkolar hisobiga ko'ra engdi (30-27, 30-27, 30-27)

Movlid Xaybulaev Jeremi Kennedini ochkolar hisobida yutdi (28-29, 29-28, 29-28)

Ted Jin Muhammad Berxamovni nokautga uchratdi (zarba) – 1-raund, 4:25

Gabriel Braga Frederik Dyuprasni sabmishn evaziga taslim etdi – 1-raund, 4:37

Masayuki Kikuiri Giannis Basharni texnik nokautga uchratdi – 2-raund, 5:00

Tay Kyun Kim Neytan Kellini sabmishn bilan yutdi (ortdan bo'g'ish) – 1-raund, 4:53