Avstraliya va boshqa mamlakat atletlari Toshkentda bahslashdi

Musobaqada Avstraliya, Qozog'iston, Qirg'iziston, Tojikiston, Turkmaniston, Saudiya Arabistoni va Malayziyadan kelgan 500 dan ziyod sportchi g'oliblik uchun bahslashdi.

O'zbekiston Jismoniy tarbiya va sport vazirligi, Milliy olimpiya qo'mitasi, mamlakatimiz engil atletika federaciyasi tomonidan tashkil etilgan ochiq kubok Xalqaro engil atletika federaciyasining musobaqalar taqvimidan joy olgan bo'lib, unda kelasi yili Tokio shahrida o'tadigan XXXII yozgi Olimpiya o'yinlariga reyting ochkolari taqdim etildi.

Kubokning turli masofalarga yugurish bahslarida vakillarimizdan SHohsanam Xurramova, Nigina SHaripova, Tamila Qo'chqorova, Veronika Grishina, Jaloliddin Hamroqulov va Evgeniy Fadeev marra chizig'ini birinchilardan bo'lib bosib o'tdi. 100 metrga to'siqlar osha yugurishda yosh atletimiz Valentina Kibalnikova g'olib bo'ldi. 10 ming metrga sportcha yurishda Mushtariy Tosheva oltin medalni qo'lga kiritdi.

Uzunlikka va balandlikka sakrashda Alina Yablokova, Nadiya Dusanova, Nikita Loginov kabi istedodli atletlarimizga hech kim teng kela olmadi.

Nayza, bosqon va yadro uloqtirishda Nargiza Qo'chqorova, Regina Adashbaeva, Sofiya Burxonova xotin-qizlar o'rtasida shohsupaning birinchi pog'onasiga ko'tarilgan bo'lsa, erkaklar bahsida Suhrob Xo'jaev, Bobur SHokirjonov va Doston Rajabov g'olib bo'ldi.