Aziz G'aniev olimpiya terma jamoasi bilan Dubaydagi musobaqada ishtirok etadi

Bir necha kun davomida milliy terma jamoa mashg'ulotlarida ishtirok etgan "Nasaf" yarim himoyachisi Aziz G'aniev bugundan olimpiya terma jamoasi ixtiyoriga qo'shildi. 

O'zbekiston olimpiya terma jamoasi 13-19 noyabr kunlari BAAning Dubay shahrida 23 yoshgacha bo'lgan terma jamoalar o'rtasida xalqaro turnirda ishtirok etadi. Unda BAA, Saudiya Arabistoni, Bahrayn, Suriya, Janubiy Koreya hamda O'zbekiston olimpiya terma jamoalari g'oliblik uchun bahs olib borishadi. SHuningdek, Iroq va Iordaniya U-23 terma jamoalarining ham ishtirok etishi ko'zda tutilgan. 

Lyubinko Drulovich G'anievni Dubaydagi musobaqaga olib ketishni istagani uchun futbolchi OTJ mashg'ulotlariga qo'shildi. 

Eslatib o'tamiz, O'zbekiston OTJ yanvar oyida Tailandda bo'lib o'tadigan U-23 Osiyo chempionatida ishtirok etadi. Ushbu musobaqa orqali Tokioda bo'lib o'tadigan Olimpiada o'yinlariga yo'llanma olish imkoniyati mavjud.