Bahodirlar o'yini qatnashchilari "Ochiq osmon ostidagi muzey"ga etib kelishdi FOTOGALEREYA

O'zbekiston Respublikasi Turizmni rivojlantirish davlat qo'mitasi, Jismoniy tarbiya va sport vazirligi, Xorazm viloyati hokimligi hamda O'zbekiston Bahodirlar o'yinlari va tosh ko'tarish federaciyasi hamkorligida 8-9 iyun kunlari “Ochiq osmon ostidagi muzey-shahar” tarifini olgan qadim Xiva shahrida elkasi erga tegmagan kurashchi, polvonlar piri Pahlavon Mahmud xotirasiga bag'ishlangan “Bahodirlar o'yini” I-xalqaro turniri hamda tosh ko'tarish bo'yicha Osiyo Ochiq chempionati o'tkaziladi. 

Bugun ertalabdan Urganch shahridagi temir yo'l vokzali hamyurtlarimiz bilan gavjum bo'ldi. Ular orasida davlat va jamoat tashkilotlari vakillari, sport faxriylari va yoshlarni uchratish mumkin edi. Hammaning yuzida tabassum ufurib turibdi. O'zaro suhbatlar ham dildan bo'layotir. Binobarin, barchasini mushtarak maqsad birlashtirgandi. U ham bo'lsa, Xorazm zaminida o'tkazilayotgan  musobaqaning bir guruh ishtirokchilarini kutib olishga qaratilgandi.

Vaqt tezda o'tib ketgani ham sezilmadi. Uzoqdan Toshkent-Urganch yo'nalishida harakatlanib kelayotgan poezd ko'zga tashlandi. Uning jarangdor gudogi yangrab, barchani hushyor tortirdi. Bu poezdning vokzalga yaqinlashayotganini bildirardi. SHu mahal yon-atrofni karnay va surnayning jo'shqin ovozi tutib ketdi. Mehmonlar milliy urf-odatlarimizga binoan non va tuz bilan kutib olindi.

SHu erning o'zida tantanali marosim uyushtirildi. Tadbirda so'zga chiqqan Xorazm viloyati Jismoniy tarbiya va sport boshqarmasi boshlig'i SH. Madaminov, Sportning qishki va murakkab texnik turlari bo'yicha Respublika oliy sport mahorati maktabi direktori K. Xolmatovlar  sportchilar va ularning murabbiylarini  muborakbod etishib, ularga xush kayfiyat tilashdi.

- Mamlakatimiz sporti hayotida unutilmas damlarning guvohiga aylanyapmiz, - dedi O'zbekiston Bahodirlar o'yinlari va tosh ko'tarish federaciyasi prezidenti V.Najmiddinov. - Elkasi erga tegmagan polvon Pahlavon Mahmud zaminida, ushbu siymo xotirasiga bag'ishlab birinchi marta mana shunday etiborli va nufuzli musobaqa uyushtiriladi. Unda dunyoning  ko'plab davlatlarining polvoni o'z mahoratini namoyish etadi. Ishonchimiz komilki, ushbu bahslar nafaqat respublikamiz sport ixlosmandlari, qolaversa, Xiva shahrini tomosha qilishga kelgan chet ellik sayyohlarda ham katta taassurotlar qoldiradi.

Malumot uchun, bellashuvlarda dunyoning 16 mamlakatidan 150 nafardan ziyod polvon ishtirok etadi.

Ikrom XUDOYBERGANOV, Urganchdan maxsus