Bahodirlar o'yinlari va tosh ko'tarish bo'yicha jahon chempionatida ikkita oltin medal qo'lga kiritdik

24 noyabrga qadar davom etadigan ushbu nufuzli musobaqada dunyoning 30 davlatidan 300 nafardan ortiq sportchi o'z omadini sinab ko'rishadi. Sankt-Peterburgdagi musobaqada vatanimiz sharafini milliy terma jamoa azolaridan Vohiddin Najmiddinov, Yodgoroy Najimova, Javohir Qurbonov hamda Asadbek O'zgamovlar himoya qilishyapti.

Yoshlar o'rtasidagi musobaqalarda Yodgoroy Najimova bronza medaliga sazovor bo'lgan edi. Bugun esa yana ikki sportchimiz O'zbekiston hisobiga jami 4ta medal qo'shib qo'yishdi, shundan ikkitasi oltin medallardir.

Jumladan, -78 kg vazn toifasidagi bellashuvlarda hamyurtimiz Javohir Qurbonov professional yo'nalishda oltin medalga sazovor bo'ldi. U 24 kilolik toshni 10 daqiqa ichida dast ko'tarish mashqida 170 marta, siltab ko'tarishda 93 bor, ikkikurashda 263 marotaba ko'tarishga muvaffaq bo'ldi. 

SHuningdek, Javohir uzun ciklda ham sovrindor bo'ldi, yani kumush medalni qo'lga kiritdi. -68 kg vazn toifasida Asadbek O'zgamov uzun ciklda eng yaxshi natija ko'rsatdi va oltin medal bilan taqdirlandi. Ikkikurashda esa O'zgamov bronza medaliga sazovor bo'ldi.

SHu tariqa bahodirlar o'yinlari va tosh ko'tarish bo'yicha yoshlar o'rtasidagi jahon chempionatida O'zbekiston terma jamoasi umumjamoa hisobida 90 ball bilan 2-o'rinni qo'lga kiritdi. Norasmiy umumjamoa hisobida musobaqa mezboni – Rossiya terma jamoasi 110 ball bilan 1-o'ringa sazovor bo'ldi. Kuchli uchlikni 70 ball bilan Latviya terma jamoasi yakunlab berdi.

Bugun faxriylar o'rtasida jahon chempionati bahslari boshlanadi. Unda vatanimiz sharafini Vohiddin Najmiddinov himoya qiladi.