Bahodirlar o'yinlari va tosh ko'tarish bo'yicha mamlakat chempionlari aniqlandi

Xabaringiz bor, Jismoniy tarbiya va sport vazirligi hamda Bahodirlar o'yinlari va tosh ko'tarish federaciyasi hamkorligida bir necha kun avval Sirdaryo viloyatida Bahodirlar o'yinlari va tosh ko'tarish bo'yicha mamlakat chempionatiga start berilgan edi.

Baxt shahri mezbonligida o'tkazilgan O'zbekiston chempionati bahslarida respublikamizning barcha hududlaridan saralangan 400 nafardan ziyod polvonlar kuch sinashishdi. Ushbu musobaqada o'smirlar, yoshlar, kattalar, faxriylar va imkoniyati cheklangan sportchilar g'oliblik uchun bellashishdi.

Qizg'in va murosasiz kechgan chempionat yakuniga ko'ra umumjamoa hisobida tosh ko'tarish bahslarida 1-o'rinni Sirdaryo viloyati jamoasi egalladi, 2-o'rin Andijon viloyati jamoasiga nasib etgan bo'lsa, kuchli uchlikni Xorazm viloyati jamoasi yakunlab berdi.

Bahodirlar o'yinlari bahslarida 1-o'rinni Surxondaryo viloyati, 2-o'rinni Andijon viloyati jamoasi egallagan bo'lsa, 3-o'rin Farg'ona viloyati polvonlariga nasib etdi.

Ushbu chempionatni o'tkazishdan ko'zlangan asosiy maqsad joriy yilning aprel oyida poytaxtimizda o'tkazilishi rejalashtirilgan Osiyo chempionatiga tayyorgarlik ko'rish va ilg'or sportchilarni saralab olishdan iborat. Musobaqa sportchilar o'zlarini imkoniyatlarini yana bir bor sinovdan o'tkazishlari uchun katta imkoniyat bo'ldi.