Baku Grand Slam. O'n ikki davlat sportchilari kamida bitta oltin medalga ega bo'lishdi

Uch kun davom etgan yilning nufuzli musobaqasida sayyoramizning 5 ta qitasi 57 davlatidan jami 449 (266 erkak, 183 ayol) nafar dzyudochi ishtirok etdi. Odatdagidek erkaklar va ayollar 7 tadan vazn toifasida tatamiga chiqishdi.

Baku Grand Slam 2019 musobaqasida uch nafar dzyudochimiz - Muhriddin Tilovov (-66 kg), Obidxon Numonov (-73 kg) hamda SHahzodbek Sobirov (-90 kg) yurtimiz sharafini himoya qildi. Ular orasida eng yaxshi natijani Muhriddin Tilovov qayd etdi. -66 kg vaznda beshinchi o'rinni egallagan Tilovov o'z hisobiga 360 reyting ochkosini yozib qo'ydi. Sobirov ikkinchi bosqichda vengriyalik Kristian Totga, Numonov esa ilk bahsdayoq bo'lajak chempion, ozarbayjonlik Xidayat Xeydarovga yutqazib qo'ydi. 

Baku Grand Slam 2019 musobaqasi yakunlariga ko'ra Yaponiya terma jamoasi 2 ta oltin, 2 ta kumush, 1 ta bronza medali bilan umumjamoa hisobida birinchi o'rinni egalladi. Dzyudo vatani vakillariga qaraganda 2 ta kumush medal kam jamg'argan Braziliya terma jamoasi (2 ta oltin, 1 ta kumush) ikkinchi o'rinni band etdi. Kuchli uchlikka mezbonlar 1 ta oltin, 2 ta kumush, 4 ta bronza medali bilan yakun yasashdi. 

Umuman olganda, 12 ta mamlakat sportchilari o'z uylariga kamida bitta oltin medal bilan qaytishdi. Ular - Yaponiya, Braziliya, Ozarbayjon, Ispaniya, Germaniya, Isroil, Gruziya, Franciya, Gollandiya Ukraina, Serbiya va Moldova davlatlaridir. Yigirma to'rtta davlat dzyudochilari kamida bitta bronza medaliga ega bo'lishdi.