"Bavariya" Germaniya kubogi sohibi yoxud afsonalar sovrinlar bilan kuzatilmoqda

Berlindagi "Olimpiashtadion"da kechgan final bahsida mamlakatning qatorasiga 7 karra chempioni bo'lgan "Bavariya" "Leypcig"ga hech qanday imkoniyat qoldirmadi. 

Birinchi bo'limda Alabaning to'p uzatmasidan Robert Levandovski hisobni ochgan bo'lsa, ikkinchi taymda Koman oradagi farqni ikkitaga oshirdi. Uchrashuv tugashiga 5 daqiqa qolganida esa Robert Levandovski Kimmixning uzatmasidan keyin finaldagi dublini rasmiylashtirib, "Bavariya"ga o'z tarixidagi 19-mamlakat kubogini taqdim etdi. SHuningdek, hujumchi 7ta gol bilan Germaniya Kubogi to'purariga aylandi. 

Niko Kovach esa qatorasiga ikkinchi yildirki Germaniya Kubogida zafar quchdi. O'tgan yili finalda "Ayntraxt" bilan aynan hozirgi jamoasi "Bavariya"ni dog'da qoldirgan mutaxassis, bu safar Ralf Rangnik boshqaruvidagi "Leypcig"ni mag'lub etdi. 

SHu tariqa Germaniya chempioni ikki yillik tanaffusdan so'ng oltin dublni rasmiylashtirdi.

Qayd etish kerakki, mazkur o'yin "Bavariya" afsonalari Riberi, Robben va Rafinya uchun myunxenliklar bilan o'tkazgan so'nggi rasmiy uchrashuvga aylandi. "RRR" "Bavariya" safidagi o'zining oxirgi ikkita bellashuvida dastlab mamlakat chempionligini, bugun esa Germaniya Kubogini qo'lga kiritdi.

"Bavariya"da "Robberi" davri tugadi! Riberi va Robbenning "Bavariya"dagi statistikasi: 425 o'yin, 124 gol, 24 sovrin - 309 o'yin, 144 gol, 20 sovrin.

Mamlakat kubogi sohibiga aylangan "Bavariya" ushbu yutuqdan keyin o'z g'aznasini 2,5 million evro bilan boyitdi va qo'shimchasiga teletranslyaciyadan tushadigan bonuslarga egalik qiladi.

Germaniya Kubogi finali.

RB Leypcig – Bavariya 0:3 (0:1, 0:2)

25 may, 23.00, «Olimpiyashtadion»

Gollar: 0:1 – 29 Levandovski, 0:2 – 78 Koman, 0:3 – 85 Levandovski.

RB Leypcig – Gulachi, Konate (Aydara, 82), Xalstenberg, Klostermann, Orban (Upamekano, 70), Zabitcer, Adams (Laymer, 65), Forsberg, Kampl, Poulsen, Verner.

Bavariya – Noyer, Zyule, Alaba, Kimmix, Xummels, Gnabri (Robben, 73), Alkantara, Martines (Tolisso, 65), Koman (Riberi, 87), Myuller, Levandovski.

Ogohlantirishlar: Upamekano (82), Levandovski (86).