Bayramni bezagan bahslar yoxud qalam ahli merganlik borasida bellashishdi

Ushbu qutlug' sana munosabati bilan joylarda uchrashuvlar, davra suhbatlari va sport musobaqalari o'tkazish ananaga aylangan. 

O'zbekiston Respublikasi “Vatanparvar” tashkiloti Xorazm viloyati kengashi, Prezident Administraciyasi huzuridagi Axborot va ommaviy kommunikaciyalar agentligi Xorazm viloyati boshqarmasi hamda viloyat texnik va amaliy sport turlari markazi hamkorligida pnevmatik miltiqdan o'q otish bo'yicha tashkil etilgan Xorazm viloyati musobaqasi ana shular sirasidan, albatta.

Urganch tumani o'quv-sport texnika klubi sport bazasida uyushtirilgan mazkur birinchilikda vohada faoliyat yuritayotgan axborot xizmati rahbarlari, ommaviy axborot vositalari vakillari, xususan, matbuot, televidenie, radio eshittirish xodimlari, jurnalist va blogerlar o'zlarining merganlik mahoratini sinovdan o'tkazishdi.

Bahslar kutilganidek juda qiziqarli kechdi. Yakuniy sarhisoblarga ko'ra, ayollar birinchiligida “8 TV” telekanali jurnalisti Feruza Ochilova zafar quchdi. Xorazm radiosi suxandoni   Bekposhsha Erkaeva ikkinchi, “8 TV” telekanali muxbiri Guli Zaripova uchinchi o'rinni egalladi. 

Erkaklar musobaqasida esa murojaat24.uz veb-sayti muharriri Najotbek Masharipov mohir mergan ekanligini isbotlab berdi. U haqli ravishda g'oliblikni qo'lga kiritdi. Ushbu yo'nalishda “S-Iqbol TV” telekanali masul xodimi Ilhom Matrasulov ikkinchi, “Istemolchi va huquq” gazetasining hududiy muxbiri Qahramon Eshchanov uchinchi o'rinni band etdi.

Ha aytgancha, tadbir doirasida “Vatanparvar – mening tanlovim” shiori ostida davra suhbati ham tashkil etildi. Unda “Vatanparvar” tashkiloti Xorazm viloyati kengashi raisi Davron Ibragimov va Axborot va ommaviy kommunikaciyalar agentligi Xorazm viloyati boshqarmasi boshlig'i D.Bekchanova qatnashib, joylarda faoliyat yuritayotgan axborot xizmati rahbarlari, ommaviy axborot vositalari xodimlari va blogerlarning jamiyatimizda tutgan munosib o'rni haqida so'z yuritishdi. 

SHuningdek, davra suhbati qatnashchilari “Vatanparvar” tashkilotining maqsad va vazifalari borasida malumotga ega bo'lishdi, o'zlarining qiziqtirgan savollarga to'laqonli javoblar olishdi.

Tabir joizki, sport motocikllari va velosipedlari, karting va parashyut sporti anjomlaridan iborat ko'rgazma ham tadbirga o'zgacha fayz va tarovat bag'ishladi.

- Bugungi tadbir ijod ahlida unutilmas taassurotlar qoldirdi, barchaga bayramona kayfiyat ulashdi. Sport – sog'lik garovi ekanligini yana bir bor isbotlab berdi. Fursatdan foydalanib, bizga mana shunday quvonchli onlarni tuhfa etgan tashkilotchilarga samimiy minnatdorchiligimizni izhor qilamiz, - deydi Urganch shahar hokimligi axborot xizmati rahbari Bahodir Xudayberganov.

Musobaqaning yopilish marosimi tantanali tarzda o'tkazildi. Birinchilikning g'olib va sovrindorlar tegishli darajadagi diplom va sovg'alar bilan taqdirlandilar.

Ikrom XUDOYBERGANOV, O'zbekiston sport faxriysi