Bir muhabbat tarixi. Messi va Antonella qanday tanishgan?

O'zining intiqlik bilan kutilgan chempionligini qo'lga kiritganidan so'ng Lionel Messi hordiq chiqarishda davom etmoqda. Bu safargi sayohatni Messi o'z rafiqasi bilan tug'ilib o'sgan shahri Rosarioga amalga oshirdi. Ushbu sayohatdan eng esda qolarli voqea ular shaharga kirib kelganida ro'y berdi. 

O'shanda muxlislar qurshoviga kirib kelgan Messilar oilasining mashinasi rulida Antonella (Messining rafiqasi) o'tirgandi. Qayd etilishicha, Antonella finaldan keyin darhol Rosarioga uchib ketgan, Leo esa dastlab Buenos-Ayresga borib u erda, chempionlik paradini o'tkazgan. 

Futbolchining turmush o'rtog'i va uch nafar farzandini uning onasi Mariya Kuchittini kutib olgan. Messilar oilasi Rodjestvoni Rosarioda nishonlash niyatida. Hozircha chempionning Parijga qachon qaytishi aniq emas.

Ko'pchilikka Messi va Antonella qanday tanishib qolgani, albatta, qiziq. Juftlikni 7 yoshligida "Nyuells Old Boyz"dagi Leoning jamoadoshi tanishtirib qo'ygan. Rokucco Lionelning bolalikdagi do'sti va 2017 yildan beri rafiqasi. Hozirda ularning 3 nafar farzani mavjud: Tiago, Matteo va Kiro.

2000 yil boshida Messi Ispaniyaga yo'l olgan, Antonella esa Argentinada qolib, dietolog sifatida tahsil olgan hamda ayollar fitnes markazida ishlagan. Orada ular bir-biri bilan uchrasha olmay yurishdi faqat qo'ng'iroq orqali onda-sonda muloqot qilishardi. Faqatgina 2004 yilga kelib, juftlik doimiy uchrashib turishni boshladi. Bunga sabab Rokucconing yaqin dugonasi avtohalokat tufayli vafot etgani bo'ldi. Leo sevgilisining og'ir damida unga dalda bo'lishni xohlagandi.

SHuni ham aytib o'tish lozimki, Messi kelishidan oldin Antonella uch yildan beri bir yigit bilan uchrashib yurar edi. Ammo Leo qaytishi bilanoq, u o'sha yigitdan voz kechdi. Keyinchalik Rokucconing sobiq sevgilisi mahalliy nashrlarga bergan intervyusida shunday degandi: "To'g'ri, u meni tark etdi. Biroq, qandaydir chol uchun emas, Messi uchun tark etdi".