Birgina Istomin Palembangga uchmadi, nima uchun?

Tarkibdan O'zbekiston Respublikasida xizmat ko'rsatgan murabbiy Samug' Obidov boshchiligidagi tennischilarimiz ham joy olishgan. Erkaklar o'rtasidagi bahslarda Denis Istomin, Jo'rabek Karimov, Sanjar Fayziev va Farrux Do'stov ishtirok etadi. 

Qizlarimizdan esa Iroda To'laganova sardorligidagi Sabina SHaripova, Nigina Abduraimova va Oqgul Omonmurodova medallar shodasi uchun kortlarga chiqishadi. Medallar erkaklar va ayollar o'rtasidagi yakkalik, juftlik hamda mikst, yani aralash juftlik bo'yicha o'ynaladi. 

Yani, birgina tennisning o'zidan 5ta medal qo'lga kiritsak bo'ladi. Albatta, oltinlar ko'proq bo'lishini istaymiz. Lekin asosiy umidimiz hisoblangan Denis Istominni Kuala-Lumpur aeroporti nazoratchilari Palembangga uchishini istashmadi. 

Gap shundaki, uning pasportidagi kirish va chiqishni ro'yxatdan o'tkazuvchi muhr qo'yiladigan varaqlari to'lib qolgan. Boshqacha bo'lishi ham mumkin emas. Denis har hafta yangi bir turnirda ishtirok etadi. 

Aynan shu kichik sabab bilan Istominning jamoamiz bilan birga uchishiga yo'l qo'yishmadi. Varaqda muhr sig'adigan joy ham bor edi. Ammo, ular qaytishda nima bo'ladi, degan vajni ilgari surishdi. 

Xullas, mamlakatimizning birinchi raketkasi kunning ikkinchi yarmidagi reys bilan Palembangga etib kelishi kerak. Har holda mutaxassislarimiz shu masalada shug'ullanishyapti. Tez orada Istomin tarkibga kelib qo'shiladi.