Boks bo'yicha O'zbekiston terma jamoasi Parij-2024 Olimpiadasiga eng ko'p sportchi bilan boradigan ikkinchi jamoa bo'ldi

Bir-biridan shiddatli kurashlar ostida kechgan turnirlarda eng kuchlilar saralandi.

Malum qilganimizdek, unda O'zbekiston terma jamoasi 11 ta (7 ta erkaklar va 4 ta ayollar) vazn toifasida Parij-2024 yo'llanmalariga sazovor bo'ldi. Qayd etish joiz, o'zbekistonlik bokschi qizlar birinchi marotaba Olimpiya o'yinlariga 4 ta licenziyaga ega chiqishgan bo'lsa, yigitlarimiz uchinchi bor ketma-ket to'liq tarkibda Olimpiada ishtirokchisiga aylanishdi.

O'zbekiston Avstraliyadan keyin boks dasturida eng ko'p yo'llanma qo'lga kiritgan davlatga aylandi. “Yashil qita” vakillari 12 ta licenziyani naqd qilgan bo'lsa, takidlanganidek, hamyurtlarimiz 11 ta yo'llanma bilan ikkinchi bo'lishdi. Avstraliyaliklar raqobat deyarli yo'q bo'lgan mintaqada ushbu ko'rsatkichga erishganlarini inobatga olish joiz. Ularning barcha yo'llanmalari qitaviy musobaqada qo'lga kiritilgan. Jahon miqyosida esa yo'llanma uchun kurashgan yigit hatto bir dona jangda ham g'alaba qozona olmagan. 

Quyida etakchi davlatlardan qaysi terma jamoa qancha licenziya qo'lga kiritgani bilan tanishamiz:

Avstraliya – 12
O'zbekiston – 11
Qozog'iston, Irlandiya, Braziliya – 10
Turkiya, AQSH, Tailand, Italiya, Franciya, Xitoy – 8.