“Bosh prokuror” kubogida polvonlar saralandi

Namangan shahridagi “Barkamol avlod” sport majmuasida milliy kurash bo'yicha “Besh tashabbus olimpiadasi” doirasidagi “Bosh prokuror kubogi” musobaqasida 30 mingdan ortiq nomzodlar orasida saralangan 18 yoshdan 30 yoshgacha 136 nafar o'g'il-qiz to'qqizta vazn toifasida g'oliblik uchun gilamga chiqdi.  

Musobaqaning tantanali ochilish marosimida qatnashgan Namangan viloyati prokurori, adliya katta maslahatchisi Umrbek Madrahimov bunday turnirlar yosh avlod o'rtasida sog'lom turmush tarzini targ'ib qilish, jismoniy tarbiya va sportni rivojlantirish, xususan, milliy g'ururimiz bo'lgan kurashning ommaviyligini oshirish muhim ahamiyatga ega ekanligini takidladi.  

Ikki kun davom etgan bellashuvlarning yakuniy natijalariga ko'ra, qizlar orasida 48 kilogramm vaznda Davlatobod tumanidan Xosiyat Hasanboeva, 57 kilogramm vaznda Uychi tumanidan Mushtariybegim Qosimova, 70 kilogramm vaznda Kosonsoy tumanidan Aziza Rahimjonova, 87 kilogramm vaznda davlatobodlik Zulfiya O'rozboeva barcha raqiblaridan ustun kelib, faxrli birinchi o'rinni qo'lga kiritdi.  

O'smirlar ishtirokidagi bahslarda esa 66 kilogramm vaznda Pop tumanidan Mardon Tursunaliev, 73 kilogramm vaznda poplik SHohruh Soyiboev, 81 kilogramm vaznda CHortoq tumanidan SHohruh Mamajonov, 90 kilogramm vaznda Namangan tumanidan Zokirjon Jamoliddinov, 90 kilogrammdan og'ir vaznlilar toifasida CHust tumanidan Muhammadali To'xtanazarov g'oliblik shohsupasiga ko'tarildi.  

Respublika Sport vazirligi, O'zbekiston Bosh prokuraturasining diplom, qimmatbaho sovg'alariga sazovor bo'lgan barcha g'olib sportchilar shu yil 14-16 noyabr kunlari Toshkent shahrida bo'lib o'tadigan “Bosh prokuror kubogi”ning hal qiluvchi final bosqichida Namangan viloyati sharafini himoya qiladi.