Bugun Butunjahon shaxmat Olimpiadasida O'zbekiston - Hindiston uchrashuvi bo'lib o'tadi

Bugun 9-turda amaldagi Olimpiada chempioni hisoblangan O'zbekiston erkaklar terma jamoasi hali mag'lubiyat va murosa nimaligini bilmay kelayotgan Hindistonga qarshi bahs olib boradi. Hindistonlik grossmeysterlar o'tkazilgan 8 ta uchrashuvning barchasida g'alaba qozonishgan. 

Kecha 8-turda ular eng yaqin taqibchilari bo'lib kelgan Eron terma jamoasini 3,5:0,5 hisobida dog'da qoldirishdi. O'zbekiston esa dramatik kechgan bahsda Serbiyadan 2,5:1,5 hisobida ustun keldi. Uchta durangdan keyin Nodirbek Abdusattorov jamoamizga muhim g'alabani taqdim etdi. U durangli partiyani g'alabaga aylantirib yubordi. 

Bugun o'tkaziladigan Hindiston - O'zbekiston uchrashuvi katta ehtimol bilan chempion nomini aniqlab berishi mumkin. To'g'ri, hali oldinda Olimpiadaning 2 ta turi bo'ladi, lekin bu bahs juda ko'p narsaga oydinlik kiritib beradi. Qolaversa, hindistonlik shaxmatchilarning bizdan oldingi Olimpiada uchun alamlari ham bor. 

9-turning markaziy uchrashuvlari:

Hindiston - O'ZBEKISTON 

AQSH - Vengriya

Xitoy - Eron 

Norvegiya - Sloveniya

Armaniston - Germaniya

Angliya - Vetnam

Turkiya - Ispaniya