Bugun "Buxoro" Namanganda, "Surxon" Olmaliqda, "So'g'diyona" Toshkentda mehmon bo'ladi

Bugun 5-tur doirasidagi uchta uchrashuv bo'lib o'tadi. O'tgan turda amaldagi chempion "Paxtakor"ni mag'lub etgan Jizzaxning "So'g'diyona" jamoasi Toshkentda "Lokomotiv" klubi mehmoni bo'ladi. 

Superliga. 5-tur

19:00. “Navbahor” – “Buxoro”

Hakamlar: Viktor Serazitdinov, Aleksandr Sidorov, Avaz Abdullaev, Axmad Ergashev

Bu ikki klub O'zbekiston chempionatlari tarixida shu kunga qadar 56 bor to'qnash kelishgan. 31 ta uchrashuvda "lochinlar"ning qo'li baland kelgan. 16 ta bahsda "Buxoro" 3 ochko egasiga aylangan va 9 ta o'yinda g'olib aniqlanmagan. O'zaro o'yinlarning oxirgi 8 tasida "Buxoro" ushbu raqibni umuman mag'lub eta olmagan. So'nggi bor buxoroliklar "Navbahor"ni 2016 yilgi mavsum Namanganda mag'lub etishgan edi.  

19:00. “Lokomotiv” – “So'g'diyona”

Hakamlar: Aziz Asimov, Xusniddin SHodmonov, Aleksandr Burov, Ilya Ilin

Restartni ikki xil kayfiyatda boshlagan klublar o'rtasidagi bahs. Ushbu jamoalar milliy chempionat doirasida hozirga qadar 24 bor o'zaro o'yin o'tkazishgan. 17 ta o'yinda "temiryo'lchilar" muvaffaqiyat qozonishgan. Uch marta jizzaxliklar zafar quchishgan. Qolgan 4 ta o'yinda durang kuzatilgan. "Lokomotiv" o'z maydonida "So'g'diyona"ga qarshi 12 ta o'yin o'tkazgan va 12 marta g'alabaga erishgan. Jizzax klubi ushbu jamoa maydonidagi 12 ta bahsda jami 3 ta gol ura olgan xolos. "Temiryo'lchilar" uyida o'tgan oxirgi 3 ta uchrashuvda mehmonlar umuman gol ura olishmagan.

20:00. AGMK – “Surxon”

Hakamlar: Rustam Lutfullin, Abduhamidullo Rasulov, Olim Abduvosilov, Abdurashid Xudoyberganov

Bu jamoalarning o'zaro o'yinlari tarixi qisqa va bu o'tgan mavsumdan boshlangan. Hozirga qadar o'tgan ikki o'yinda ikkala jamoa bittadan g'alabaga erishgan. Olmaliqdagi bahsda AGMK 2:0 hisobida g'olib bo'lgan, Termizda esa "Surxon" 1:0 hisobida zafar quchgan. Bu mavsum AGMK Coca Cola Superligasida mag'lub bo'lmagan ikkita klubdan biri bo'lib turibdi. "Surxon" esa bu yilgi yagona g'alabasini safarda qo'lga kiritdi.