Bugun futbol. "Paxtakor" - "So'g'diyona"

CHempionlik sari dadil odimlayotgan "Paxtakor" o'z maydonida "So'g'diyona"ni qabul qiladi. Turnir jadvalida "Paxtakor" 44 ochko bilan birinchi o'rinni egallab turibdi. "So'g'diyona" hisobida 24 ochko mavjud bo'lib, 9-o'rinda boryapti. 

"Paxtakor" hozirgacha faqat bitta o'yinda mag'lub bo'lgan va shu mag'lubiyat Jizzaxda "So'g'diyona" bilan kechgan bellashuvda ro'y bergan. Bugun "Paxtakor" o'sha mag'lubiyat alamini olishga, "So'g'diyona" esa birinchi davradagi g'alaba tasodif emasligini isbotlashga urinib ko'radi. 

Ikkinchi davraga start berilgach, "Paxtakor" hozircha 4ta o'yinda maydonga tushib, shundan uchtasida g'alaba qozondi va bir bor durang o'ynadi. Jizzaxliklar esa beshta uchrashuvda ishtirok etib, shundan ikkitasida g'alabaga erishishdi. Yana ikkita bahs durang natija bilan tugadi va bir bor mag'lubiyat qayd etildi. 

Fakt: "So'g'diyona" safarda 6 ta o'yindan beri g'alaba qozona olmayapti. Bu jamoa so'nggi bor 6-tur uchrashuvida "Lokomotiv" ustidan zafar quchgan.