Bugun ham Islom birdamligi o'yinlarida 4 ta sport turida hamyurtlarimizga muxlislik qilamiz

Xabaringiz bor, islom olamidagi ushbu nufuzli musobaqada O'zbekiston terma jamoasi ham katta sport delegaciyasi bilan ishtirok etyapti. Bugun musobaqaning navbatdagi kuni o'zbekistonlik atletlar xuddi kecha bo'lganidek, 4 ta sport turida tashkil etiladigan bahslarda o'z mahoratlarini namoyish etadilar. 

Sportchilarimizning bugungi ishtirokini velosportchilarimiz boshlab berishadi. Velotrekning omnium bahslarida Olga Zabelinskaya, Margarita Misyurina, Aleksey Fomovskiy va Botir Ismatov yurtimiz sharafini himoya qiladilar. Ular kunning birinchi yarmida o'tkaziladigan saralash bahslarida startga chiqishadi. Zabelinskaya kecha terma jamoamizga oltin medal taqdim etib ulgurgandi. 

Bugun ham para suzish musobaqalari davom ettiriladi. Kecha 100 metr masofaga batterflyay usulida o'tkazilgan bahslarda chempionlik shohsupasiga ko'tarilgan Azizbek Boynazarov bugun 200 metr masofaga aralash suzishda kechagi natijasini takrorlashga urinib ko'radi. 

Kunning ikkinchi yarmida etiborimiz sport turlari malikasi hisoblangan engil atletika hamda voleybol bellashuvlariga qaratiladi. Atletlarimizdan Oskar Kuchmuradov (100 m), Darya Reznichenko va Roksana Xudoyorova (ikkisi ham uzunlikka sakrash), Laylo Allaberganova (100 m), Jasmina Mansurova (langarcho'pga tayanib sakrash), Zarina Nosirjonova (bosqon uloqtirish), Farida Solieva (400 m), Evgeniy Fadeev (5 000 m) va Doston Rajabov (yadro uloqtirish) medallar uchun bahslarga kirishadilar.

Bugungi ishtirokimizni voleybol bo'yicha O'zbekiston ayollar terma jamoasi ishtirokidagi o'yin yakunlab beradi. Qizlarimiz mezbonlar Turkiya terma jamoasiga qarshi bahs olib borishadi.