Bugun Istomin Nyu-Xeven turniridagi ishtirokini boshlaydi

Sovrin jamg'armasi 162 480 dollarni tashkil qiluvchi musobaqada hamyurtimiz Denis Istomin ham ishtirok etadi. Mamlakatimizning birinchi raketkasi Nyu-Xeven turnirida sakkizinchi raqam ostida saralangan. 

Qura natijasiga ko'ra, Denis o'z ishtirokini bugun to'g'ridan-to'g'ri ikkinchi bosqichdan boshlaydi. Uning raqibi amerikalik tennischi Donald Yang bo'ladi. 

Taqqoslash uchun, Istomin dunyo reytingida 139, Yang esa 197-o'rinni egallab turibdi. Tennischilar shu kungacha o'zaro to'rt marotaba to'qnash kelishgan. Ikkita uchrashuvda Denis, qolgan ikkitasida Yang zafar quchgan.