Bugun Nodirbek Abdusattorov SHusha turnirida 4 ta uchrashuv o'tkazadi + FOTO

O'z tarixida 10-marotaba tashkil etilayotgan ushbu nufuzli turnirda jami 8 nafar grossmeyster, ular qatorida hamyurtimiz Nodirbek Abdusattorov ham ishtirok etyapti. Mamlakatimizning birinchi raqamli shaxmatchisi mazkur musobaqaning 2022 yilgi chempioni hisoblanadi. 

Xabar berganimizdek, Nodirbek kecha o'tkazilgan 3 ta tur uchrashuvida 3 xil natija qayd etdi. G'alaba bilan boshlab, o'rtada durang va yakunda mag'lubiyat bilan tugatdi. Bugungi uchrashuvlar oldidan u qo'shimcha ko'rsatkichlarga ko'ra 5-o'rinni egallab turibdi. Kecha 3-turda aynan Abdusattorovni taslim etgan Yan Nepomnyashiy musobaqa jadvalida yakka peshqadamlik qilyapti. Kecha u Nodirbekning qo'pol xatosidan unumli foydalanib ketgandi. 

Bugun rapid yo'nalishida qolgan 4 ta tur uchrashuvlari o'tkaziladi. Abdusattorov bugungi ishtirokini qora donalarda Vladislav Artemevga qarshi bahs bilan boshlaydi. Keyin oq donalarda ozarbayjonlik SHaxriyar Mamedyarov bilan hisob-kitob qiladi. Oltinchi turda yana oq donalarda o'ynaydi, bu safargi raqib - Richchard Rapport! Rapiddagi ishtirokini qora donalarda mezbonlar vakili Rauf Mamedovga qarshi uchrashuv bilan yakunlaydi.   

Malumot uchun, norvegiyalik Magnus Karlsen turnirning 4 karra g'olibi hisoblanadi. SHaxriyar Mamedyarov ikki bor chempionlikka erishgan bo'lsa, Fabiano Karuana (AQSH), Nodirbek Abdusattorov (O'zbekiston) va Vidit Santosh (Hindiston) bir marotabadan bosh sovringa ega chiqqan.