Bugun Vetnamda O'zbekiston - Afg'oniston uchrashuvi bo'lib o'tadi

O'z tarixida beshinchi marotaba o'tkazilayotgan ushbu musobaqada plyaj, yani sohil futboli bo'yicha O'zbekiston terma jamoasi ham ishtirok etyapti. Ahad Yusupov bosh murabbiyligidagi sohil futboli vakillarimiz “S” guruhi g'olibi sifatida chorak finalga yo'l olgandi.

Bugun terma jamoamiz chorak finalda Afg'oniston bilan munosabatiga oydinlik kiritib oladi. Afg'onistonlik sohil futbolchilar guruhning so'nggi o'yinida Xitoy terma jamoasidan ustun kelishdi va o'z kvartetlarida ikkinchi o'rinni band etishdi. 

Tarkibga etibor qaratadigan bo'lsak, futzalchilardan tashqari sobiq mashhur futbolchi, Tojievlar sulolasining to'ng'ich vakili Zayniddin Tojiev ham bor.

Eng katta kamchilik bu – so'nggi yillarda plyaj futboli bo'yicha O'zbekiston chempionatining o'tkazilmayotganidir. Klublar bo'lmaganidan keyin chempionat qaerdan bo'lsin? Tabiiyki, futbolchilar ham yo'q. SHunday holatda Ahad Yusupov “boltadan sho'rva” tayyorlaganiga qoyil qolish kerak.

Osiyo o'yinlariga bir hafta qolganida yig'ilgan tarkib musobaqaga yo'l oldi. Hozircha, natija yomon emas. Yarim finalga chiqish uchun imkoniyatimiz yuqori. Bugun Afg'oniston terma jamoasiga qarshi kechadigan uchrashuvda futbolchilarimizga omad tilab, ulardan g'alaba kutib qolamiz.