Butunjahon shaxmat Olimpiadasi. Asosiy raqiblarimiz 3-turda qanday natija qayd etishdi + FOTO

Amaldagi Olimpiada chempioni hisoblangan O'zbekiston erkaklar terma jamoasi ketma-ket uchta turda g'alabaga erishdi. Yosh grossmeysterlarimiz 45-Butunjahon shaxmat Olimpiadasining 1-turida Trinidad va Tobago, 2-turda Misrni, 3-turda esa Xorvatiyani bir xil 3,5:0,5 hisobida mag'lubiyatga uchratib, chempionlik himoyasini davom ettirishyapti. 

Terma jamoamizning asosiy raqiblari ham oson g'alabalarga erishishmoqda. Hindiston terma jamoasi kecha o'tkazilgan 3-turda Vengriyani 3,5:05, Xitoy Sloveniyani 3:1, AQSH Bolgariyani 3,5:0,5, Ozarbayjon Moldovani 3:1, Armaniston Braziliyani 3:1 hisobida taslim etdi. 

Jami 16 davlat terma jamoalari 100 foizlik ochko qo'lga kiritib, qo'shimcha ko'rsatkichlarga ko'ra jadvalda etakchilik qilishyapti. Bu turda biroz kutilmaganda Italiya Niderlandiyani 3:1, Litva Germaniyani 2,5:1,5 hisobida taslim etib qo'ydi.

Kecha o'tkazilgan 3-turda Ukraina Avstraliyadan 2,5:1,5, Serbiya SHveycariyadan 2,5:1,5, Magnus Karlsen boshchiligidagi Norvegiya esa Kolumbiya terma jamoasidan 3,5:0,5 hisobida ustun keldi.