Butunjahon shaxmat Olimpiadasi. Bugun har ikki terma jamoamiz Qora qita vakillariga qarshi dona suradi

Dunyoning ikki yuzga yaqin davlati terma jamoalari qatnashayotgan nufuzli musobaqada bugun 2-tur uchrashuvlari o'tkaziladi. Amaldagi Olimpiada chempioni hisoblangan  O'zbekiston erkaklar terma jamoasi bugun misrlik shaxmatchilarga qarshi bahs olib boradi. 

Ehromlar yurti jamoasi ham biz singari 1-turda 3,5:0,5 hisobidagi g'alabani tantana qildi. O'zbekiston Trinidad va Tobagoni, Misr esa Gana terma jamoasini xuddi shu hisobda taslim etgan. 

Jami 184 ta terma jamoa qatnashayotgan ayollar o'rtasidagi musobaqada Aleksey Dreev murabbiyligidagi O'zbekiston terma jamoasi muvaffaqiyatli start oldi. Qizlarimiz ilk turda Gaiti davlati shaxmatchilarini 4:0 hisobida dog'da qoldirishdi. Bugun 2-turda ular Angola terma jamoasiga qarshi dona surishadi. Afrikaliklar 1-turda Jibuti terma jamoasini 4:0 hisobida engishdi.