Butunjahon shaxmat Olimpiadasi. Kechagi g'alaba sabab ayollar o'rtasidagi bahslarda ko'tarildik + JADVAL

O'zbekiston ayollar terma jamoasi kecha 7-turda Greciyani 2,5:1,5 hisobida mag'lubiyatga uchratdi. Qizlarimiz 45-Butunjahon shaxmat Olimpiadasining 1-turida Gaitini 4:0, 2-turda Angolani 3:1, 3-turda Vengriyani 2,5:1,5, 4-turda Bolgariyani 2,5:1,5 hisobida engishdi. Beshinchi turda amaldagi Olimpiada vice-chempioni Gruziyaga 1,5:2,5 hisobida imkoniyat boy berildi. Qizlarimiz 6-turda Niderlandiya bilan 2:2 hisobida durang o'ynashdi. Kecha esa greciyalik shaxmatchilar taslim etildi. 

Bugun O'zbekiston ayollar terma jamoasi 8-turda AQSH shaxmatchilariga qarshi dona suradi. Amerikaliklar safida o'zbekistonlik ayol grossmeyster Gulruhbegim Tohirjonova o'ynayapti. Lekin bugun O'zbekiston bilan bahsda u ishtirok etmaydi.

Amerikaliklar ham xuddi biz singari 5 g'alaba, 1 durang va 1 mag'lubiyat bilan 11 ochkoga ega bo'lib turibdi. Qo'shimcha ko'rsatkichlarga ko'ragina AQSH turnir jadvalida 5, O'zbekiston esa 11-o'rinni band etgan. Jami 10 davlat terma jamoalari hisobida 11 ochkodan bor. Bu esa bahslarning murosasiz kechayotganidan darak.

Ayollar o'rtasidagi musobaqada ham xuddi erkaklarda bo'lgani singari bitta terma jamoa 100 foizlik natija qayd etib turibdi. Hindiston 7 ta uchrashuvning barchasida g'alaba qozongan. Hindlar 7-turda Gruziyani 3:1 hisobida engishdi. Vengriya xuddi shu hisobda Avstriyadan ustun keldi. Ukraina - Polsha uchrashuvida 2:2 hisobi qayd etildi. 

Qo'shni Qozog'iston shaxmatchilari ozarbayjonlik dugonalarini 3:1 hisobida mag'lub etib, 12 ochko bilan 3-o'rinni egallab turishibdi. Ikkinchi pog'onadagi Polsha hisobida ham 12 ochko bor. AQSH terma jamoasi 7-turda Armaniston bilan 2:2 hisobida durang o'ynadi. 

8-turning markaziy uchrashuvlari:

Polsha - Hindiston 

Vengriya - Ukraina 

Qozog'iston - Franciya

Gruziya - Bolgariya

O'ZBEKISTON - AQSH

Niderlandiya - Germaniya

Armaniston - Mo'g'uliston

Sloveniya - Xitoy

Ozarbayjon - Italiya

Ispaniya - Slovakiya