Butunjahon shaxmat Olimpiadasi. Qizlarimiz bugun Serbiyaga qarshi dona surishadi

Xabar berganimizdek, bugun yigitlarimiz peshqadam Hindistonga qarshi muhim uchrashuvni o'tkazishadi. Qizlarimiz esa 9-turda Serbiya terma jamoasi bilan hisob-kitob qilishadi. Bugungi uchrashuvlar ham soat 18:15 da boshlanadi.

Yakuniy juftliklar birozdan so'ng aniq bo'ladi. Hozircha terma jamoalarning 5 nafardan azosi taqdim etilgan. Katta ehtimol bilan amaldagi Olimpiada chempioni bo'lib turgan O'zbekiston terma jamoasining hindistonlik grossmeysterlarga qarshi uchrashuvida dastlabki to'rtlik harakat qiladi. 

Ayollar o'rtasidagi musobaqada ham Hindiston terma jamoasi peshqadamlik qilyapti. Ular 7 g'alaba va 1 mag'lubiyat qay etishgan. Olti g'alaba va ikki durangga ega Polsha terma jamoasi ikkinchi o'rinni band etgan bo'lsa, kuchli uchlikka 7 g'alaba va 1 mag'lubiyatga ega Qozog'iston yakun yasagan. Bu uch terma jamoa 14 ochkodan jamg'argan. 

O'zbekiston ayollar terma jamoasi esa kechagi mag'lubiyatdan keyin 25-o'ringa tushib ketdi. Qizlarimiz 5 g'alaba, 1 durang, 2 mag'lubiyat evaziga 11 ochko to'plashgan. Bugungi raqibalarimiz hisobida ham 11 ochko bor. Serbiya biz singari 5 g'alaba, 1 durang va 2 mag'lubiyat bilan 22-pog'onadan joy olgan.