Butunjahon shaxmat Olimpiadasi. Qizlarimiz durang o'ynashdi

42-Butunjahon shaxmat Olimpiadasida O'zbekiston ayollar va erkaklar terma jamoalari ham ishtirok etyapti. Kecha o'tkazilgan 4-tur uchrashuvida ayollar terma jamoamiz durang natija qayd etdi. Avstriya terma jamoasi shaxmatchilariga qarshi dona surgan qizlarimiz 2:2 hisobidagi murosaga kelishdi.

Nafisa Mo'minova Regina Pokornani mag'lubiyatga uchratdi. Gulruhbegim Tohirjonova va Sarvinoz Qurbonboeva raqibalari bilan durang o'ynashdi. Nodira Nodirjonova esa mag'lubiyat alamini totib ko'rdi.

Ushbu durangdan so'ng terma jamoamiz qo'shimcha ko'rsatkichlarga ko'ra 35-o'rinni egallab turibdi. Bugun shaxmatchi qizlarimiz Ozarbayjon-3 jamoasiga qarshi dona surishadi.

Eslatib o'tamiz, O'zbekiston ayollar terma jamoasi birinchi turda Paragvay terma jamoasi ustidan 4:0 hisobida g'alaba qozongandi. Ikkinchi turda esa Belgiya terma jamoasi shaxmatchilari 3:1 hisobida mag'lub etilgan edi. Uchinchi turda musobaqaning birinchi tartib raqamli jamoasi Rossiyaga 1:3 hisobida imkoniyat boy berilgandi.