Butunjahon shaxmat Olimpiadasi. Qizlarimiz ham yutqazishdi

42-Butunjahon shaxmat Olimpiadasida O'zbekiston ayollar va erkaklar terma jamoalari ham ishtirok etyapti. Kecha o'tkazilgan 3-tur uchrashuvida erkaklar singari ayolar jamoamiz ham mag'lubiyat alamini totib ko'rdi.

Rossiya terma jamoasi shaxmatchilariga qarshi dona surgan qizlarimiz kuchli raqibga 1:3 hisobida imkoniyatni boy berishdi. Opa-singillar Nafisa Mo'minova va Gulruhbegim Toxirjonova mos ravishda Aleksandra Kostenyuk hamda Valentina Guninaga yutqazishdi. Irina Gevorkyan va Sarvinoz Qurbonboeva raqibalari bilan murosaga kelishdi.

Ushbu mag'lubiyatdan so'ng terma jamoamiz qo'shimcha ko'rsatkichlarga ko'ra 36-o'ringa pastladi. Bugun shaxmatchi qizlarimiz Avstriya terma jamoasiga qarshi dona surishadi.

Eslatib o'tamiz, O'zbekiston ayollar terma jamoasi birinchi turda Paragvay terma jamoasi ustidan 4:0 hisobida g'alaba qozongandi. Ikkinchi turda esa Belgiya terma jamoasi shaxmatchilari 3:1 hisobida mag'lub etilgan edi.