Butunjahon shaxmat Olimpiadasi. Raqiblar jiddiylashmoqda, bugun har ikki jamoamiz evropaliklar bilan o'ynaydi

Dunyoning ikki yuzga yaqin davlati terma jamoalari qatnashayotgan nufuzli musobaqada bugun 3-tur uchrashuvlari o'tkaziladi. Amaldagi Olimpiada chempioni hisoblangan  O'zbekiston erkaklar terma jamoasi bugun xorvatiyalik shaxmatchilarga qarshi bahs olib boradi. Xorvatiya 1-turda Malavi terma jamoasini 4:0, 2-turda Qirg'iz Respublikasini 3:1 hisobida mag'lub etgan. 

Jami 184 ta terma jamoa qatnashayotgan ayollar o'rtasidagi musobaqada Aleksey Dreev murabbiyligidagi O'zbekiston terma jamoasi ham muvaffaqiyatli odimlamoqda. Qizlarimiz ilk turda Gaiti davlati shaxmatchilarini 4:0, 2-turda Angolani 3:1 hisobida dog'da qoldirishdi. Bugun 3-turda qizlarimiz Vengriya terma jamoasiga qarshi dona surishadi. Mezbonlar 1-turda Puerto-Rikoni 4:0, 2-turda esa Ekvador terma jamoasini 3,5:0,5 hisobida engishdi.