Butunjahon shaxmat Olimpiadasi. Sakkizinchi turdagi raqiblarimiz malum!

Dunyoning ikki yuzga yaqin davlati terma jamoalari qatnashayotgan nufuzli musobaqada 7-tur uchrashuvlari ortda qoldi. Amaldagi Olimpiada chempioni hisoblangan O'zbekiston erkaklar terma jamoasi bu turda tajribali grossmeyster va jahon chempionlarini o'zida jamlagan Ukrainani 3:1 hisobida taslim etdi. 

Bugun esa yosh shaxmatchilarimiz 8-turda Serbiya terma jamoasiga qarshi dona surishadi. Serbiyaliklar kecha 7-turda Niderlandiyadan xuddi biz kabi 3:1 hisobida ustun kelishdi. Ular ham biz kabi 6 g'alaba va 1 mag'lubiyatga ega bo'lib turishibdi. Serbiya 1-turda Gvatemala terma jamoasini 4:0, 2-turda Estoniyani 2,5:1,5, 3-turda SHveycariyani 2,5:1,5 hisobida engishdi. To'rtinchi turda Hindistonga 0,5:3,5 hisobida yutqazishdi. Beshinchi turda Braziliyadan 2,5:1,5, 6-turda CHilidan 4:0, kecha o'tkazilgan 7-turda esa aytib o'tganimizdek, Niderlandiyadan 3:1 hisobida ustun kelishdi. Tarkibida Aleksandr Predke, Aleksey Sarana, Aleksandar Indjich singari taniqli grossmeysterlar bor. 

Jami 184 ta terma jamoa qatnashayotgan ayollar o'rtasidagi musobaqada Aleksey Dreev murabbiyligidagi O'zbekiston terma jamoasi ham muvaffaqiyatli odimlamoqda. Qizlarimiz ilk turda Gaiti davlati shaxmatchilarini 4:0, 2-turda Angolani 3:1, 3-turda esa ancha kuchli hisoblangan mezbon Vengriya terma jamoasini 2,5:1,5, 4-turda tarkibida jahon chempioni bo'lgan Bolgariyani 2,5:1,5 hisobida engishdi. Beshinchi turda tarkibida uch nafar grossmeysteri bor, Butunjahon shaxmat Olimpiadasining amaldagi vice-chempionlari Gruziyaga 1,5:2,5 hisobida imkoniyatni boy berishdi. Niderlandiya bilan 2:2 hisobidagi jangovar durangga imzo chekishdi. Greciyadan 2,5:1,5 hisobida ustun kelishdi. 

Bugun esa qizlarimiz 8-turda AQSH terma jamoasiga qarshi dona surishadi. Amerikaliklar ham biz singari 5 g'alaba, 1 durang va 1 mag'lubiyatga ega bo'lib turishibdi. Gulruhbegim Tohirjonova o'ynayotgan AQSH terma jamoasi 1-turda Iordaniyani 4:0, 2-turda Filipinni 3,5:0,5, 3-turda yon qo'shnilari Kanadani 3,5:0,5, 4-turda Niderlandiyani 3,5:0,5 hisobida mag'lub etishdi. Beshinchi turda kutilmaganda Mo'g'ulistonga 1,5:2,5 hisobi bilan yutqazib qo'yishdi. Oltinchi turda SHveycariyani 2,5:1,5 hisobida engishdi. Kecha 7-turda Armaniston bilan durang o'ynashdi - 2:2. Tohirjonova kecha 1-doskada Lilit Mkrtchyanga imkoniyatni boy berdi.