Butunjahon shaxmat Olimpiadasi yakunlandi, medallar o'z egalariga topshirildi + FOTO

Dunyoning 189 davlati qatnashgan musobaqada 11 uchrashuvdan 10 g'alaba va 1 ta durang qayd etgan Hindiston terma jamoasi SHaxmat Olimpiadasi chempionligini qo'lga kiritdi. Hindistonlik grossmeysterlarni faqatgina bundan avvalgi Olimpiada chempioni bo'lgan O'zbekiston terma jamoasi to'xtatib qoldi. Bu ikki terma jamoa o'rtasidagi bahsda 2:2 hisobidagi jangovar durang natija qayd etilgandi. 

Olimpiadaning kumush medallari AQSH, bronza medallari esa O'zbekiston terma jamoasiga nasib etdi. Individual yo'nalishlarda SHamsiddin Vohidov o'z taxtasida oltin medalga ega chiqdi. Nodirbek Abdusattorov va Nodira Nodirjonova esa kumush medal qo'lga kiritdi. 

Ayollar o'rtasidagi musobaqada ham Hindiston terma jamoasi chempionlik shohsupasiga ko'tarildi. Hindlar Butunjahon shaxmat Olimpiadasida oltin dubl qayd etishdi. Qozog'iston terma jamoasi kumush, tarkibida Gulruhbegim Tohirjonova bo'lgan AQSH shaxmatchi qizlari bronza medali bilan taqdirlanishdi. Musobaqaning tantanali yopilish marosimida medal hamda kuboklar o'z egalariga topshirildi.