Champions Chess Tour. Nodirbek Abdusattorov Kanadadagi superturnirning 1/2 finalida o'ynaydi

Umumiy mukofot jamg'armasi 500 000 AQSH dollarini tashkil etuvchi ushbu musobaqaning final bosqichida dunyoning sakkiz nafar kuchli grossmeysteri qatorida hamyurtimiz Nodirbek Abdusattorov (2727) ham ishtirok etmoqda. 

Kecha o'tkazilgan so'nggi ettinchi turda Nodirbek franciyalik Maksim Vashe-Lagrav (2771)ni 2:1 hisobida mag'lubiyatga uchratdi. Dastlabki ikki partiyada durang natija qayd etildi. Hal qiluvchi uchinchi partiyada qora donalarda harakat qilgan Abdusattorov reytingda o'zidan yuqorida turgan raqibini mag'lubiyatga uchratdi va guruh bosqichini 4-o'rinda yakunladi. 

So'nggi turda amaldagi jahon chempioni Magnus Karlsen franciyalik Alireza Firuzjadan 2:1 hisobida ustun keldi. Amerikalik Uesli So yagona mag'lubiyatini aynan 7-turda vatandoshi Fabiano Karuanadan qabul qilib oldi. Garchi 1:2 hisobida yutqazgan bo'lsa-da, So Magnus Karlsen bilan birga to'g'ridan-to'g'ri 1/2 final yo'llanmasini qo'lga kiritdi. Karlsen ham yagona mag'lubiyatini aynan Ueslidan qabul qilib olgandi. 

Musobaqa reglamentiga ko'ra 3-6 o'rinni egallagan jamoalar o'zaro yarim finalning ikki chiptasi uchun bahs olib borishdi. Guruhda to'rtinchi o'rinni band etgan Abdusattorov Survival bosqichida dastlab Fabiano Karuanaga qarshi bahs olib bordi. Birinchi partiyada Fabiano, ikkinchisida Nodirbek zafar quchdi. G'olib nomini aniqlab bergan armagedon partiyasida Karuananing qo'li baland keldi. Ikkinchi juftlikda Hikaru Nakamura Maksim Vashe-Lagravdan armagedon partiyasida ustun keldi. Yarim finalning so'nggi ishtirokchisini aniqlab bergan mag'lublar uchrashuvida esa Abdusattorov Nakamurani engdi. Ikki partiyada durang qayd etildi, armagedonda esa Nodirbek chiroyli g'alabaga erishib, 1/2 finalning so'nggi ishtirokchisiga aylandi. 

Demak, 1/2 finalda Magnus Karlsen Fabiano Karuanaga, Nodirbek Abdusattorov Uesli Soga qarshi dona suradi.