CHimyonda eko-sayyohlik sport festivali o'tkazilmoqda + FOTO

Ayni paytda mamlakatimizdagi vazirliklar, idoralar hamda yirik tashkilotlarning sport targ'ibotchilari, shuningdek 20 nafardan ortiq ommaviy axborot vositalari xodimlari CHimyondagi "Yoshlar oromgohi"da bo'lib turishibdi.

Bugun, 13 fevral kuni basketbol, voleybol, badminton va mini-futbol kabi sport turlaridan musobaqalar tashkil etildi. Unda tashkilotlarning sport targ'ibotchilari, shuningdek OAV vakillari ham ishtirok etishdi. Bundan tashqari, kun davomida maxsus o'quv-seminar ham bo'lib o'tdi va unda targ'ibotchilar uchun o'z tashkilotlarida sport musobaqalarini tashkil etish bo'yicha tushuntirishlar berib borildi. 

"Ushbu tadbirni tashkil etishdan maqsad Muhtaram yurtboshimizning "Qishki sport turlarini rivojlantirish chora-tadbirlari to'g'risida"gi qarorlari, shuningdek Vazirlar Mahkamasining "Aholining sog'lom turmush tarzini qo'llab-quvvatlash va jismoniy faolligini oshirishga doir qo'shimcha chora-tadbirlar to'g'risida"gi qaror ijrolarini taminlashga qaratilgan. 

Ushbu festivalimizda Respublikamizning vazirlik va yirik tashkilotlarida faoliyat olib borayotgan sport targ'ibotchilari, qolaversa OAV xodimlari ishtirok etishmoqda. Festival davomida bir necha yo'nalishda musobaqalar o'tkaziladi va muvaffaqiyatli ishtirok etgan havaskor sportchilarga esdalik sovg'alari taqdim etiladi", - dedi ushbu festival tashkilotchilaridan biri Umid Rajabov.

"Mazkur festivalda nafaqat tashkilotlarning sport targ'ibotchilari, balki ommaviy axborot vositalari xodimlarining sportchi sifatida ishtirok etayotganliklari quvonarli hol. Zero OAV xodimlari ham aslida sport targ'ibotchilari hisoblanishadi. Yurtimizda faoliyat olib borayotgan OAV xodimlari Jismoniy tarbiya va sport vazirligi tashabbusi bilan hozirda "Yoshlar oromgohi"ga kelishgan. Ular festival tafsilotlarini yoritish bilan bir qatorda, o'zlari ham musobaqalarda faollik ko'rsatishmoqda", - dedi vazirlik matbuot xizmati rahbari Otabek Eshmamatov.

Ertaga dastur bo'yicha qishki sport turlariga bag'ishlangan tadbirlar tashkil etiladi.

Aziz To'xtamurodov

Foto: Alimurod Mamadaminov