05 fev 12:05
Yangiliklar

Dzyudo

CHirchiqda "Toshkent viloyati hokim kubogi" musobaqasi o'tkazildi

Teglar : Yangi O'zbekiston – Olimpiya cho'qqilari

CHirchiq Olimpiya va paralimpiya sport turlariga tayyorlash markazida dzyudo bo'yicha kichik o'smirlar o'rtasida “Yangi O'zbekiston – Olimpiya cho'qqilari” sport musobaqalari doirasida “Viloyat hokimi kubogi” bo'lib o'tdi.

Musobaqaning tantanali ochilish va taqdirlash marosimi tashkil etilib, unda Toshkent viloyati sport boshqarmasi boshlig'i Rustam Boboqulov, CHirchiq OPSTTM direktori Ravshan Gafurov, CHirchiq shahar sport maktabi direktori Suhrob Sultonov va Toshkent viloyati Yakkakurash sport turlariga ixtisoslashgan sport maktabi direktori Doniyor Yusupov ishtirok etdi.

Toshkent viloyatining barcha tuman va shaharlaridan kelgan 200 nafardan ziyod yosh dzyudochilar kun davomida g'oliblik uchun bor mahoratlarini namoyish etishdi. Murosasiz bellashuvlarda Lazzat Ergasheva (33 kg. Parkent t.), Perizat Gauxarova (44 kg. Bo'stonliq t.), Mohinur Eshqobilova (52 kg. Ohangaron t.), Asadbek Ahmadjonov (46 kg. CHirchiq sh.), Avazbek Haydarov (66 kg. CHOPSTTM), Umidjon Abduqodirov (73 kg. Angren sh.) singari o'g'il-qizlar o'z vazn toifalarida g'oliblikka erishdi.

Musobaqa yakunlangach, barcha g'olib va sovrindorlar diplom, medal va esdalik sovg'alari bilan mukofotlanishdi.

— Mazkur musobaqa o'z o'rnida yosh iqtidorlarni saralash vazifasini o'tab berishi bilan ham ahamiyatli bo'ldi, — deydi dzyudo bo'yicha Toshkent viloyati terma jamoasi bosh murabbiyi Avazbek Korganov. — Ortda qolgan 2025 yilda shogirdlarimiz bilan birgalikda mamlakat miqyosidagi musobaqalarida ishtirok etib, sovrinli o'rinlarni egallashga muvaffaq bo'lgan edik. Bu yilgi maqsadimiz ham "Yangi O'zbekiston olimpiya cho'qqilari" musobaqasining final bosqichida, Respublika chempionatlarida g'oliblar qatoridan joy olib, dzyudo bo'yicha milliy terma jamoalar safiga shogirdlarimizni ishtirokini taminlash bo'ladi.