Delray Beach ATP 250. Istomin reytingda o'zidan 150 pog'ona yuqoridagi tennischini mag'lub etdi

Avval xabar berganimizdek, ushbu nufuzli musobaqada mamlakatimizning birinchi raketkasi Denis Istomin ham ishtirok etyapti. Hamyurtimiz turnirdagi ishtirokini saralash bahslaridan boshladi. U avvaliga yarim finalida reytingda o'zidan 114 pog'ona yuqorida borayotgan avctriyalik Yuriy Rodionovni 6:4, 6:2 hisobida mag'lub etdi.

Keyin esa saralashning final uchrashuvida ekvadorlik Emilio Gomesdan 7/6(7), 6/2 hisobida ustun kelib, asosiy to'rga yo'l oldi. Gomes ATP reytingida 149, Istomin esa 267-o'rinni egallab turibdi. Kecha tunda Denis asosiy to'rning ilk davrasida dunyoning 117-raketkasi, amerikalik Sem Kuerriga qarshi kortga chiqdi. 

Bir soatu 12 daqiqa davom etgan uchrashuvda Istomin nomdor raqibini 6/1, 7/6(5) hisobida mag'lubiyatga uchratdi. Tennischilarning o'zaro uchrashuvlarida Denis hisobda oldinga chiqib oldi - 3:2! 

Endi yurtdoshimiz ikkinchi davrada yana bir AQSH tennischisi, dunyoning 41-raketkasi Tommi Polga qarshi kortga chiqadi. Hozircha tennischilarning o'zaro uchrashuvlarida hisob teng bo'lib turibdi - 1:1. Istomin - Pol bahsi Toshkent vaqti bilan bugun tunda soat 00:30da boshlanadi.