Delray Beach Open. Teylor Fritc chempionlik unvonini himoya qildi

Noqulay ob-havo sharoiti tufayli bir kunga kechiktirilgan final uchrashuvida dunyoning to'qqizinchi raketkasi, musobaqaning amaldagi chempioni Teylor Fritc amerikalik vatandoshi Tommi Polga qarshi kortga chiqdi. Vatandoshlar o'rtasidagi bahsda Fritc ATP reytingida 14-pog'onada borayotgan Polni 6/2, 6/3 hisoblarida mag'lubiyatga uchratdi. 

Tennischilarning o'zaro uchrashuvlaridagi hisob muvozanati tiklandi - 4:4. 101 daqiqa davom etgan bahsda Fritc 5, Pol 3 ta eys zarbasini amalga oshirgan. Qo'shxatolar Tommida ko'proq bo'ldi - 4 ga 2. Fritc chempionlik unvonini himoya qilish barobarida faoliyatidagi ettinchi ATP sovrinini qo'lga kiritdi. 

Delray Beach Open turniridagi muvaffaqiyatli ishtirok chempionga 250 reyting ochkosi hamda 100,640 AQSH dollari miqdoridagi mukofot pulini taqdim etdi. Pol esa 165 ochko va $58,705 ishlab oldi.