Denis Istomin US Open turniriga jo'nab ketdi

Mamlakatimizning birinchi raketkasi Palembangdan Jakartaga yo'l oldi va Indoneziya poytaxtidan Turkiyaning Istanbul shahriga uchadi. U erdan esa bevosita Nyu-York shahriga etib oladi. 

Istomin "Katta Dubulg'a" turkumiga kiruvchi US Open turniriga Palembang - Jakarta - Istanbul - Nyu-York avia reysi bo'yicha etib boradi. Tasavvur qilyapsiz-a, qancha masofa bosib o'tilishini. Sportchilarga oson emas. 

Eslatib o'tamiz, Denis Istomin AQSH Ochiq chempionatining asosiy to'r ilk davrasida amerikalik Stiv Jonsonga qarshi kortga chiqadi. Bu uchrashuv agar o'zgarish bo'lib qolmasa, dushanbadan seshanbaga o'tar kechasi o'tkaziladi. 

Taqqoslash uchun, Denis Istomin dunyo reytingida 75-o'rinni egallab turibdi. Jonson esa 34-pog'onadan joy olgan. Ikki tennischi shu kungacha o'zaro bir marotaba to'qnash kelishgan. 2015 yilning 18 sentyabr kuni Toshkentda AQSH terma jamoasiga qarshi kechgan bahsda Istomin Jonsonni 6:1, 3:6, 7:6(5), 6:7(3), 7:5 hisobida mag'lub etgan edi.

Kamoliddin Alimov (Palembang, Indoneziya)