Devis Kubogi. Istominsiz o'tadigan Livan - O'zbekiston uchrashuviga qura tashlandi

Pyotr Lebed boshchiligidagi tennischilarimiz Juniya shahrida Livan terma jamoasi mehmoni bo'lishadi. 13-14 sentyabr kunlari o'tkaziladigan bahslarda mamlakatimizning birinchi raketkasi Denis Istomin ishtirok eta olmaydi. U ayni paytda Turkiyaning Istanbul shahrida o'tayotgan turnirda muvaffaqiyatli qatnashyapti. 

Bugun Livan - O'zbekiston uchrashuviga bag'ishlangan matbuot anjumani hamda qura tashlash marosimi bo'lib o'tdi.  Unga ko'ra musobaqaning birinchi kuni ikkita yakkalik uchrashuvlari o'tkaziladi. 

Dastlab, Sanjar Fayziev Hali Habibga qarshi kortoga chiqadi. Keyin esa Humoyun Sultonov Benjamin Hasanni sinovdan o'tkazadi. SHanba kuni juftlik hamda ikkita yakkalik bahslarida g'oliblar aniqlanadi. 

Unda Jo'rabek Karimov va Sanjar Fayziev juftligi Mishel Saad hamda Roy Tabet tandemi bilan hisob-kitob qiladi. Yakkalikda esa Benjamin Hassan Sanjar Fayzievga, Hadi Xabib Humoyun Sultonovga qarshi kortga chiqadi.