Devis Kubogi. O'zbekiston - Buyuk Britaniya: bugun Istomin boshlab beradi FOTO

Devis Kubogi erkaklar terma jamoalari o'rtasidagi norasmiy jahon chempionati hisoblanadi. Bugun yakkalik bahslarida ikkita uchrashuv o'tkaziladi. “Emirates Arena”dagi ilk uchrashuv Denis Istomin ishtirokida kechadi. 

Mamlakatimizning birinchi raketkasi mezbonlarning ikkinchi raqamli tennischisi Dani Evansga qarshi kortga chiqadi. O'tgan hafta yakunida CHikago “CHellenjer” turnirida bosh mukofotni qo'lga kiritgan Istomin dunyo reytingida 60, uning bugungi raqibi esa 222-o'rinni egallab turibdi. 

Istomin - Evans uchrashuvi Toshkent vaqti bilan soat 17:00da boshlanadi. Bu bahs yakuniga etishi bilan ikkinchi yakkalik uchrashuvi start oladi. Unda mezbonlarning birinchi raketkasi Kemeron Norri bizning ikkinchi raqamli tennischimiz Jo'rabek Karimov bilan hisob-kitob qiladi. Norri reytingda 70, Jo'rabek esa 434-o'rinni band etgan. 

SHuningdek, O'zbekiston terma jamoasi tarkibidan Humoyun Sultonov, Sanjar Fayziev va Farrux Do'stov ham joy olgan. Terma jamoa murabbiyi va sardori Petr Lebed.

Buyuk Britaniya terma jamoasi tarkibi esa quyidagicha ko'rinishga ega: Kemeron Norri, Jey Klark, Deniel Evans, Jeymi Marrey, Dominik Inglot. Yulduz tennischi Endi Marrey jarohat sabab ishtirok etmaydi. Terma jamoa sardori - Leon Smit.