Diyora Keldiyorova O'zbekistonda yilning eng yaxshi sportchisi bo'lishning ahamiyati haqida gapirdi

Diyora u joriy mukofotga ega chiqish asosiy maqsadlaridan bo'lganini, bir necha yildan beri ushbu nomga ega chiqish uchun harakat qilayotganini takidladi.

– Bu mukofot Sizga qanday motivaciya beradi?

– 3 yildan beri bu nomni qo'lga kiritish uchun harakat qilayotgan edim. Bunday mukofotga sazovor bo'lish 2024-yilgi nasib qilgan ekan, bundan juda ham xursandman. CHunki o'z yurtimizda yilning eng yaxshi sportchisi bo'lish biz atletlar uchun xuddi Olimpiadada g'alaba qozongan bilan barobar. Sportchi yaxshi karera qilgan bo'lsada, lekin o'z Vatanida eng yaxshi bo'lish nasib qilmasligi ham mumkin. Endi bunga munosib bo'lib, yanada yaxshi natijalar ko'rsatishga harakat qilaman.

– Tadbirda qatnasha olmagan bo'lsangiz ham nimalarni his qildingiz?

– Bazi sabablarga ko'ra taqdirlash marosimida ishtirok eta olmadim. Lekin tadbir shukuhini his qilib turdim. Yurtimizda juda ko'p iqtidorli sportchilar bor. Ular orasida men g'alaba qozonganim faxrlanarli voqelik bo'ldi. Bu yil oldimga qo'ygan maqsadlarimdan biri nafaqat Olimpiada chempionligi, balki ushbu nomga ega chiqish ham edi.

– Sizga IJF tomonidan o'tkazilayotgan tanlovda ham eng yaxshi bo'lishingizni tilab qolamiz.

– Rahmat, buning uchun qo'llab turgan barcha yurtdoshlarimizga cheksiz minnatdorchiligimni bildirib qolaman.