Duatlon bo'yicha O'zbekiston kubogi professional va havaskorlarni o'zida jamladi

Unda havaskor va professional sportchilar o'zaro bahs olib borishdi.

Yurtimizda ommaviy sport targ'ibotini yanada kuchaytirish yo'lida tashkil etilayotgan mazkur musobaqa bir qator yosh toifalarida havaskor va professional sportchilar ishtirokida o'tkazildi. Hozirda suzish bellashuvlarini o'tkazish sportchilarning salomatligi uchun biroz xavfli bo'lgani uchun atletlar yugurish va velopoyga bo'yicha kuch sinashishdi.

Musobaqada yurtimizning turli hududlaridan tashrif buyurgan 100 nafardan ortiq sportchilar ishtirok etishdi. Tantanali taqdirlash marosimida O'zbekiston Respublikasi Prezidenti huzuridagi Xavfsizlik kengashi kotibi, O'zbekiston triatlon federaciyasi raisi Viktor Mahmudov, O'zbekiston Milliy Olimpiya qo'mitasi raisi Rustam SHoabdurahmonov va Bosh kotib Oybek Kasimov ishtirok etib, mamlakatimizda sport targ'iboti yo'lida o'z hissasini qo'shib kelayotgan barcha qatnashchilarga samimiy minnatdorchilik bildirishdi.

Yakunda musobaqa g'olib va sovrindorlari munosib taqdirlanishdi. Takidlash joiz, bu kabi musobaqalarning tashkil etilishi yoshlarning sportga bo'lgan qiziqish va mehrlarini yanada ko'paytirish yo'lida muhim ahamiyatga ega.