Dzyudo. Jahon chempionatidagi omadsiz seriya davom etadi

Sayyoramizning 131 mamlakatidan 800 nafarga yaqin sportchi ishtirok etayotgan yilning nufuzli musobaqasida o'zbekistonlik polvonlar ham o'z imkoniyatlarini sinovdan o'tkazishyapti. Lekin shu kungacha o'tkazilgan bahslarda hech bir dzyudochimizga xatto guruhdan chiqish nasib etmadi.

-70 kg vazn toifasidagi xotin-qiz dzyudochilar bahsida ikki sportchimiz tatamiga chiqdi va ularning har ikkisi ham ilk uchrashuvdayoq mag'lubiyat alamini totib ko'rishdi. SHohista Nazarova polshalik Darya Pogorzelechga, tajribali Gulnoza Matniyozova esa yaponiyalik Yoko Onoga yutqazib qo'ydi. 

-90 kg vazndagi polvonimiz Davlat Bobonov o'z ishtirokini to'g'ridan-to'g'ri ikkinchi bosqichdan boshladi va gollandiyalik Van End Noelga imkoniyatni boy berdi. Bu vaznda ispaniyalik Nikoloz SHerazadashvili jahon chempioni bo'ldi. 

Bugun erkaklar -100, qizlar -78 kg vazn toifasida tatamiga chiqishadi. Muhammadkarim Xurramov ilk davrada senegallik Bae Diavarraga, SHerali Jo'raev estoniyalik Grigori Minaskinga qarshi bahs olib boradi. Nodira Yo'ldosheva polshalik Bita Pakut sinovidan o'tadi.