Dzyudo. Jakarta va Buenos-Ayresga tayyorgarlik davom etmoqda

Tayyorgarlikning ayni bosqichida dzyudochilarimizning umumiy jismoniy tayyorgarliklariga katta etibor qaratilmoqda. Bu borada sportchilar rejaga binoan mashg'ulotlar olib borishmoqda. O'smirlar va yoshlar terma jamoamiz «Osiyo dzyudo markazi»da, kattalar esa «Yangiobod» o'quv bazasida yig'in o'tkazmoqda.

Nufuzli musobaqalar oldidan terma jamoa azolarining kayfiyati alo darajada. Reyting musobaqalarida ishtirok etayotgan yosh polvonlarimizda Buenos-Ayresdagi musobaqaga licenziya qo'lga kiritish uchun yaxshi imkoniyat yuzaga kelgan.

Qayd etib o'tish lozimki, u erda dzyudochilarimizning jismoniy-tibbiy holatiga ham alohida etibor qaratilmoqda. Terma jamoa shifokori sportchilarning organizmidagi o'zgarishlar, vazn bilan bog'liq masalalarga alohida yo'nalish bo'yicha ish olib borayapti. Avvallari faqat massajchi bilan ishlangan bo'lsa, endilikda bu masalaga ilmiy tomonlama, alohida etibor bilan yondoshilayotgani kishini xursand qildi. Bu jihat albatta muhim musobaqalar vaqtida o'z tasirini o'tkazishi aniq.

Terma jamoa murabbiylari sportchilarni tayyorlashda o'ziga xos usullardan foydalanishmoqda. Mashg'ulotlar kuniga ikki mahaldan o'tkazilmoqda. Ertalab sportchilar gilam ustida mashq bajarishsa, kechki mashg'ulotlarda asosan jismoniy holatni kuchaytirishga bag'ishlangan mashqlar olib borilmoqda.