Dzyudo. Qizlarimizda Evropa Ochiq Kubogida bittadan kumush va bronza+FOTO

Ushbu musobaqada yurtimiz sport sharafini Iskandar Rasulov va Bayrambay Satullaev murabbiyligidagi yosh dzyudochilarimiz himoya qilishyapti. Qizlarimizdan ikki nafari turnirning birinchi kuni sovrindorlar safidan joy olishdi. 

-52 kg vazn toifasida tatamiga chiqqan vakilamiz Nilufar Ermagambetova finalga qadar mag'lubiyatsiz etib borib, kumush medal bilan taqdirlandi. U finalgacha turkiyalik Eda Karademir, ozarbayjonlik Ulviyya Bayramova, shveciyalik Kayleyx Vinnerlendni ippon bahosi evaziga taslim etdi. Oltin medal uchun kechgan bahsda esa mo'g'ulistonlik Sosorbaram Lxagvasurenga imkoniyatni boy berdi. 

-44 kg vazndagi hamyurtimiz Halimajon Qurbonova bronza medaliga sazovor bo'ldi. U bellashuvlarda qozog'istonlik Ayim Jumagalieva, turkiyalik Ozkan Xanifeni mag'lub etib, yarim finalda yana bir mezbon sportchi Azak Mevrega yutqazib qo'ydi. Bronza medali uchun kechgan bahsda esa kosovolik Erza Muminoviqni ippon bahosi, yani sof g'alaba evaziga engdi.