Dzyudo. Yoshlarimizda Osiyo chempionatining ilk kuni 8ta medal!

Qitamizning 17 davlati dzyudochilari qatorida yurtimiz sportchilari ham Osiyo chempionati medallari uchun tatamiga chiqishyapti. Kecha musobaqaning birinchi kuni terma jamoamiz azolari jami 8 ta medal qo'lga kiritishdi.

SHulardan ikkitasi oltin medallardir. Kattalar terma jamoasi bosh murabbiyi Andrey SHturbabinning o'g'li Artyom -66 kg vaznda barcha raqiblarini mag'lubiyatga uchratib, Osiyo chempioniga aylandi. SHturbabin yarim finalda yaponiyalik Kenshi Xarada, finalda esa eronlik Alirizo Xo'jastexni mag'lub etdi.

Terma jamoamizga ikkinchi oltin medalni -73 kg vaznda tatamiga chiqqan Muso Sobirov taqdim etdi. U finalda mo'g'ulistonlik Batbold Bulganni muddatidan avval mag'lubiyatga uchratdi.

Hamyurtlarimizdan Manucher SHirinov, Behruz Amandavlatov, Gulnur Muratbaeva va Sanobar Sultonova kumush medalni qo'lga kiritdi. Kimyo Marasulova va Kemran Nurullaev bronza medali bilan taqdirlandi.

Hozircha umumjamoa hisobida dzyudochilarimiz 8 ta medal bilan ikkinchi o'rinni band etishgan. Hisobida bizga nisbatan bitta oltin medal ko'p bo'lgan dzyudo vatani Yaponiya terma jamoasi umumjamoa hisobida birinchi o'rinni egallab turibdi.