Dzyudochi Diyorbek O'rozboev taqdirlandi

O'zbekiston Respublikasi Prezidentining Nufuzli xalqaro sport musobaqalarida yuksak natijalarga erishgan O'zbekiston sportchilarini jamoat va sport ishlariga keng jalb etish hamda sportchilarni va ularning trenerlarini rag'batlantirish to'g'risidagi qarorida nufuzli xalqaro sport musobaqalarida yuksak natijalarga erishgan O'zbekiston sportchilarini pul mukofotlari bilan rag'batlantirish belgilab qo'yilgan.

O'zbekiston Respublikasi Prezidentining farmoyishiga binoan dzyudo bo'yicha jahon chempionatida sovrindor bo'lgan Diyorbek O'rozboevga pul mukofoti sertifikatini 26 oktyabr kuni O'zbekiston Respublikasi jismoniy tarbiya va sport davlat qo'mitasida rais o'rinbosari Farhod Turdiev sport jamoatchiligi faollari huzurida dzyudochining o'zi ayni paytda davolanishda ekani bois ustozi Farhod To'raevga topshirdi.

Dzyudo bo'yicha jahon chempionati joriy yilning 28 avgustidan 3 sentyabrga qadar Budapesht shahrida o'tkazilgan edi. O'rozboev 60 kilogrammgacha vazn toifasida muvaffaqiyatli qatnashib, Isroil, Angola, Gruziya va Mo'g'ulistonlik raqiblarni enggan va shohsupaning uchinchi pog'onasidan joy olgandi.

Darvoqe, Diyorbek O'rozboev o'tgan yili Rio-de-Janeyro shahri mezbonlik qilgan yozgi olimpiya o'yinlarida terma jamoamizga dastlabki medalni tuhfa etgan edi. Biz Diyorbekdan yangi va yorqin g'alabalarni kutib qolamiz.