Dzyudochilarimiz Osiyo o'yinlaridagi o'z rekordlarini yangilashdi: o'zbek dzyudosi tarixida yangi sahifa ochgan - Xanchjou-2022!

Quvonarli jihati, o'zbekistonlik dzyudochilar mazkur musobaqada har qachongidanda muvaffaqiyatli ishtirok etib, O'zbekiston dzyudosi tarixida yangi sahifa ochishdi. Xanchjoudagi turnir O'zbekiston dzyudosi uchun eng muvaffaqiyatli Osiyo o'yinlariga aylandi. 

O'zbekiston mustaqil ravishda 1994 yildan beri Osiyo o'yinlarida ishtirok etib keladi. Xirosimada bo'lib o'tgan musobaqada o'zbekistonlik dzyudochilar 2 ta (ikkisi ham bronza) medalni qo'lga kiritib, umumjamoa hisobida 8-o'rinni egallashgan.  

-1998 yil Bangkok shahridagi bahslarda 3 ta (1 ta kumush, 2 ta bronza) medal bilan 8-o'rinni band etishgan.  

-2002 yil Janubiy Koreyaning Pusan shahrida o'tkazilgan o'yinlarda 4 ta (1 ta kumush, 3 ta bronza) medal bilan 7-o'rin egallangan. 

-2006 yil Qatar poytaxti Doha mezbonlik qilgan musobaqada 4 ta (hammasi bronza) medalga sazovor bo'lib, 8-o'rin band etilgan. 

-2010 yil Guanchjouda bo'lgan turnirda 7 ta (1 ta oltin, 3 ta kumush, 3 ta bronza) medalga ega chiqib, o'yinlarni 4-o'rinda yakunlaganmiz. O'shanda Rishod Sobirov o'zbekistonlik dzyudochilar ichida ilk bor Osiyo o'yinlaridagi oltin medalni qo'lga kiritgan edi.

-2014 yil Janubiy Koreyaning Incheon shahrida bo'lib o'tgan kompleks musobaqada 5 ta (1 ta kumush, 4 ta bronza) medalga erishib, 6-o'rin egallangan. 

-2018 yil Indoneziyaning Jakarta va Palembang shaharlarida o'tkazilgan o'yinlarda 4 ta (1 ta oltin, 3 ta bronza) medal bilan 4-o'rinni egallagan. 

Xanchjoudagi o'yinlarda esa yurtdoshlarimiz jami 9 ta medalni o'ziniki qildi. Bulardan 3 tasi oltin, 2 tasi kumush va 4 tasi bronza medallaridir. Ushbu ko'rsatkich bilan O'zbekiston terma jamoasi medallar jamg'arish reytingida faqatgina dzyudo vatani sanalmish Yaponiyadan orta qoldi. “Kunchiqar yurt” vakillari 5 ta oltin, 2 ta kumush va 3 ta bronza, jami 10 medal bilan reytingda birinchi bo'ldi. 

Turnirda medal qo'lga kiritgan dzyudochilarimiz ro'yxati: 

Oltin: 

-73 kg: Murodjon Yo'ldoshev

-100 kg: Muzaffarbek To'raboev

-52 kg: Diyora Keldiyorova 

Kumush: 

-90 kg: Davlat Bobonov

Miks bo'yicha terma jamoamiz 

Bronza: 

+100 kg: Alisher Yusupov

-48 kg: Halimajon Qurbonova

-70 kg: Gulnoza Matniyozova

-78 kg: Irisxon Qurbonboeva.

Xanchjoudagi Osiyo o'yinlarida dzyudo bo'yicha medallar jamg'arish reytingi: 

Xabib Jo'raboev tayyorladi