“F-4 UAE Championship”da o'zbekistonlik pilot o'z natijasini yaxshilamoqda + FOTO

Ushbu nufuzli musobaqada ilk marotaba hamyurtimiz, O'zbekiston Milliy avtomobil klubi (O'zMAK) azosi Ismoil Ahmadxo'jaev ham ishtirok etyapti va ahamiyatlisi, hozircha debyutant pilotimizning natijalari chakki bo'lmayapti. Takidlash kerak, mazkur musobaqa bir nechta bosqichda o'tkaziladi.

Musobaqaning ilk bosqichida hamyurtimiz marra chizig'ini 23-o'rinda kesib o'tdi. Bir qator poygachilar marraga etib kelisholmagani va Ismoil Ahmadxo'jaev uchun bu ilk musobaqa bo'lganligini inobatga olsak, natija yomon emasligi oydinlashadi. Boz ustiga, debyut musobaqasida har qanday sportchida kuchli hayajon bo'ladi va sportchi eng avvalo raqib bilan emas, o'zidagi hayajon bilan kurashishi, hayajonini engib o'tishi talab qilinadi.

Musobaqaning ikkinchi va uchinchi bosqichlarida hamyurtimiz o'z natijasini sezilarli darajada yaxshilab, marraga 19-o'rinda etib keldi. O'z natijasini biryo'la 4ta pog'onaga oshirish debyutant pilot uchun chakki ko'rsatkich emas.

Bugun “F-4 UAE Championship” xalqaro turnirining to'rtinchi bosqichi o'tkazilmoqda va shu bilan birinchi raund o'z yakuniga etadi. “F-4 UAE Championship”poygasi Abu-Dabidagi “Yas Marina Circuit” trassasida bo'lib o'tmoqda. Ushbu trassada Formula-1 poygalari ham o'tkazilishini avtopoyga ixlosmandlari yaxshi bilishadi.

Eng yuqori xavfsizlik standartlariga rioya qilingan holda hamda xarajatlarni meyor darajasida ushlab turish orqali tashkil etilayotgan “F-4 UAE Championship” musobaqasi yosh poygachilarga xalqaro miqyosda tan olingan trassalarda o'z mahoratlarini oshirish va formula toifalarida o'z faoliyatini boshlash uchun etarli vaqt davomida mashq qilish uchun ideal platformadir.

Umid qilamizki, ushbu musobaqa hamyurtimiz uchun kelajakda Formula-4 ning Italiya yoki Britaniyadagi bosqichlari, qolaversa Formula-3, Formula-2 va nihoyat Formula-1 poygalari uchun tramplin vazifasini o'tab beradi.